Унагыг өсгөх

Унага хүнтэй аль болох ойр байна төдий чинээ хурдан дасаж дуулгавартай болж чадна. Жүчээнд төрсөн унагыг тэр дор нь хүнтэй дасгах хэрэгтэй. байгалийн нөхцөлд төрсөн унага хүнээс аймхай байдаг. Гүү төрөлх мэдрэмжээрээ унагаа маш ихээр харамладаг учир эхэн үедээ хүн ойртуулдаггүй. Туршлагатай адуучин тэвчээртэй оролдсоны эцэст унагыг дасгаж чадна.
Унагатай харьцах
Унагатай гүүг том зогсоолд байрлуулж эхний үедээ эхийнх нь дэргэд унаганд ойртож болно. Унага үргэлж эхээсээ хамгаалалт эрэх боломжтой байх ёстой. Унаганд зөвхөн хүн дэргэд нь байгаа үед ногт зүүж бусад үед авна. Унага бүх биендээ хүнийг хүргэдэг болтол дэргэд нь байж маллах хэрэгтэй. Унаганы арьсан дах тоос дулаан хадгалах чанартай ба задгай агаарт гаргасан үед арьсыг хамгаалдаг тул унагыг яаран цэвэрлэх шаардлагагүй. Жижиг унагыг уявал сандралд орж уяагаа мултлахыг оролдсоноос өөрийгөө бэртээж болзошгүй тул уясаны хэрэггүй. Унагыг харьцангуй богино хугацаанд гараараа хөтөлж явж сургаж болдог. Түүнчлэн тайван итгэлтэй үгээр өгсөн тушаалыг биелүүлж сургана. Унаганд аль болох тайван хандсанаар итгэл төрүүлж чаддаг. Тэрээр өөрт нь сайн хандаж байгааг амархан ойлгож чадахгүй байж магадгүй. Унага нэгэнт дуулгавартай ногтлуулж эзэн хүнээ хүндэтгэж байгаа бол хүний дэргэд тайван зогсож хөлөө шалгуулахаар чөлт-өгч чаддаг болгон сургана.
Унагыг хөтлөх
Эхлээд унаганы ногтонд уяа уяж үзүүрийг нь хоёр гараараа барих ба шаардлагатай бол хурдхан суллаж тавина. Түүнчлэн нэг гараараа унаганы цээжнээс барьж нөгөө гараараа ташаанд хүргэн унагыг хөтөлж явдаг.Унага хөтлөх дасгалыг хаалттай байранд хийх нь зүйтэй. Эхийнх нь дэргэд унагыг барьж тэрээр мултран зугтахыг оролдохгүй болтлоо тайвшрах цаг хугацаа өгнө . Алдуурсан унгагыг дахин барьж, туршлагатай туслагчийн хамтаар эхийг нь тойруулан хөтлөн явж, аажмаар хөтөлгөөнд сургана. Унагыг яг таарсан ногтоор ногтлох ба уяа нь зүүн дор байхаар тохируулна. Эхийнхээ дэргэд байгаа унагыг хамт цэвэрлэж, тэжээж, туурайг үзэж байвал арван хоёр сартайгаас эхлэн унага өөрөө ямар нэгэн эсэргүүцэлгүй дарханд туурайгаа үзүүлдэг болно.
Тэжээх
Хэдийгээр унага өвс хазлах боловч хамгийн гол тэжээл нь эхийн сүү юм. Намар хүртэл унаганд эхийн сүүнээс гадна шим тэжээлтэй ногоон өвс ургамал хоол болно.
Байгалийн нөхцөлд амьдарч байгаа адуунд нэмэгдэл тэжээл өгөх шаардлагагүй. Намраас өвс ургамал тэжээллэг чанараа алдаж эхлэх үеэс нэмэгдэл тэжээл, хадсан өвс өгч эхэлнэ. Өвөлдөө гүү, унага хоёрыг маш сайн арчилгаа, маллагаатай байлгах хэрэгтэй. Жилийн турш шахмал тэжээл иддэг цэвэр үүлдэрийн гүүний хувьд, унаганд нь хоёр сартайгаас эхлэн бага багаар шахмал тэжээл өгнө. Нэмэгдэл тэжээлийг бага багаар өгөхгүй бол хоол боловсруулахад эрхтэнд муугаар нөлөөлж болзошгүй. Унага чацага алдах буюу түгжирэх шинж тэмдэг илэрч байгаа эсэхийг сайн анхаар. Ясны гурил буюу загасны тос гэх мэт нэмэлт тэжээлийг өгөхдөө малын эмчтэй урьдчилан зөвлө. Гүү, унага хоёрт байнга өтнөөс сэргийлэх эмчилгээ хийнэ.
Эхээс нь салгах
Унагыг хөхнөөс нь гаргахад унага эх хоёрын аль алинд нь хямралд үүсдэг. Хэд хэдэн унагыг зэрэг хөхнөөс нь гаргахад хялбар байдаг. Зургаагаас есөн сартай үедээ унага эхээ үгүйлэх нь багасдаг учир энэ үед нь хөхнөөс гаргавал зохино. Унагыг хөхнөөс нь гаргасан эхний нэг сарын хугацаанд тусад нь байлгаж, эхийг нь харуулж дууг нь сонсгож болохгүй. Олонхи тохиолдолд гүүг унагааас нь салгах амар байдаг. Унагыг ганцааранг нь хэзээ ч үлдээж болохгүй ба дэргэд нь наад зах нь хоёр адуу байлгах хэрэгтэй. Мэдрэмтгий унагууд өөрийн итгэлтэй хүрээлэлд үлдвэл сайн. Байгалийн нөхцөлд гүү жилийн хугацаанд унагаа хөхнөөс нь гаргадаг. Заримдаа сүргийн өөр гүү унагыг хэд хоногийн турш өөртөө дасган төрсөн эхээс нь холдуулах замаар хөхнөөс нь гаргадаг арга бий. Ийм үедээ унага бусад унагануудтай ойр байхыг эрмэлзэх ба ганцааранг орхиж болохгүй. Хөхнөөс нь гаргасаны дараа унаганд илүү анхаарал, арчилгаа маллагаа шаардлагатай. Энэ үед түүнийг сургах хамгийн тохиромжтой цаг хугацаа юм. Унагыг гол төлөв нэг настай байхад нь дараагийн хавар болохоос өмнө засдаг. Азарга тавихаар телөвлеж байгаа бол унагыг гүүнээс тусад нь байлгана. Хэрвээ бие махбодын хувьд боловсорч гүйцсэн бол нэг нас хүрэхээс нь өмнө ч гүүнээс тусгаарлаж болно. Азарга үрээг тусад нь маллаж, туршлагатай адуу үржүүлэгчийн хараа хяналтын дор өсгөнө.