Тэргүүн дэвжээ байраа хадгалж чадалгүй “Таванхан”-д алдав

Монголын үндэсний бөхийн холбооноос “Нутгаа дуурсгана” барилдаан өндөрлөж, усан луу жилийн тэргүүн дэвжээгээр Сэлэнгийн “Таванхан” тодров. Тэд барилдаан эхэлсэн цагаас хойш нэг ч удаа ялагдал хүлээгээгүй юм. Нутгийнхаа шилдэг хүчтэнүүдийг барилдуулсан нь үр дүнгээ өгч 2010 онд гуравдугаар байр эзэлсэн амжилтаа ахиулж чадлаа. Тэдний энэ амжилтыг дэвжээний эзэн Б.Буяндорж, Сэлэнгэ аймгийн Засаг даргын Тамгын газрынхан маш сайн дэмжсэн гэдгийг бөхчүүд нь ярьж байгаа юм. Хамгийн гол нь тэд хүчээ зөв хуваарилж чадаж байна. Мөн зохион байгуулалт сайтай байсны үр дүнд луу жилийн тэргүүн дэвжээгээр тодров. Тэгвэл луу жилийн тэргүүн дэвжээ шалгаруулах барилдаанд үзүүрлэсэн “Их Монголын хүчтэн”-ий хувьд хэсгийн барилдаанд дундаж амжилттай байсан ч финалд барилдаанаа сайжруулав. Үүний хүчинд бас өмнөх амжилтаа үлэмж ахиулж чадлаа. “Увс нуур”-ынхан барилдаан эхэлсэн цагаас л үлэмж сайн байсан. Үүнтэй хүн бүхэн санал нэгдэнэ байх. Гэвч финалын сүүлчийн шийдвэрлэх барилдаанд Ө.Бат-Орших харцага буруу шийдвэр гаргасны улмаас баг нь Өвөрхангайнханд ялагдсанаар гуравдугаар байранд орсон юм. Хэрвээ Ө.Бат-Орших харцага барилдаанаа дуусгасан бол арай л өөр болох байлаа. Тус дэвжээнд харьяалалтай бөхчүүдээс аймгийн заан Т.Баасанхүү бусдаасаа ялгарсныг дурдахгүй өнгөрч болохгүй. Финалд шалгарсан дэвжээдээс хамгийн зохион байгуулалт муутай нь “Хантайшир”, “Бөхбилэгт” хоёр. Архангайг монголчууд бөхийн өлгий нутаг хэмээн дээдэлдэг. Гэвч финалд хүн дутуу гэсэн шалтгаанаар хоёр ч барилдаанд шаардлагагүй ялагдал хүлээж улмаар зургадугаар байр эзэлсэн. 2010 оныг бодвол амжилт нь ахисан бөхий өлгий нутгийнхан үүнээс ч илүү амжилт үзүүлэх боломж байлаа. Аймгийн хурц арслан Р.Пүрэвдагва хэдэн залуучуудын хамт чадлаараа зүтгэсэн. Даанч нэмэр байсангүй. Алтайн хөх харчууд л гэхэд өч төчнөөн улс, аймгийн цолтонтой мөртлөө хүчээ зөв хуваарилж чадаагүйн улмаас тэргүүн дэвжээ гэсэн нэр төрөө хадгалж чадаагүй юм. Финалын шийдвэрлэх барилдаануудад хүн дутуу барилдаж, энэ нь тэдэнд шаардлагагүй ялагдлыг “бэлэглэсэн”. Нэг үгээр хэлбэл алтай нутгийн цолтнууд тун хариуцлагагүй байсныг амтай бүхэн ярьж байна. Магадгүй зарим нэг нь үүнийг “Аса” циркт болж буй “Хасу” лигтэй холбон тайлбарлаж болох юм. Энэ бол шалтаг биш. Зарим дэвжээ хүчээ зөв хуваарилж болоод л байсан. Үүний нэг тод жишээ нь Сэлэнгийн “Таванхан”. Тус аймгийн хүчтэнүүд “Хасу”, “Нутгаа дуурсгана”-ы аль алинд л амжилттай байгаа. Мөн Дорноговь, Өмнөговь, Баян-Өлгийн хүчтэнүүд ч гэсэн боломжоороо багаа бүрдүүлж тодорхой хэмжээний амжилт үзүүлснийг бөх сонирхогчид мэднэ.

Б.ЗУЛ