Домогт саарлын цуут эзэн

Уул ус ургамал хангай нь тэгширсэн Булган нутгийн уяачдаас хамгийн өндөр цолтон нь мэдээж Могод сумын уугуул Цэгмэдийн Цэнгэл  юм. Хар багын адуунд адуунд дуртай байсан тэрээр морь унах далим гаргах гэж гүү саах цагийг битүүхэн хүлээдэг байсан гэлцдэг. Тэр ч бүү хэл адуучин болно гэх дэврүүн мөрөөдөлтэй шавилхан бор хүү цэргээс ирсэн ах нарын моринд явдал оруулан нэг үе үгүй шуугиулж явсан аж. ММСУХ-г үндэслэгч Пунцагбалжир агсантай багаасаа нөхөрлөсөн Манлайих ажлын стресс тайлан адуун дээр нь очиж цагаан гүүний саам уудаг байснаа дурсах дуртай. Харин хүүхэд насны дурсамж сэргээн морь маланд шимтэх болсноо тээр жилийн Хэнтий аймгийн Дэлгэрхаанд болсон өндөр бооцоот уралдаан л нөлөөлсөн хэмээн  ярьдаг юм.  Халхын хурдан буянгууд чуулсан тэр жилийн наадам Могодын хүүгийн нандин дурсамжийг сэргээн, адуутай нөхөрлөхийн бахдалыг мэдрүүлсэн биз.

Тэр цагаас хойш уяачийн жаргал зовлон шунан нэг үе ид хавыг гайхуулан урамтай сайхан наадаж, өдгөө монгол төрийн наадмаас зургаан түрүү, хоёр айраг хүртэн МУ-ын Манлай уяачид эрэмблэгдээд буй юм.
Булган нутгийн нэрийг дуурсган төрийн наадмыг чимж буй Манлайн нэртэй саарал азаргыг адуунд хайртай ард түмэн андахгүй. “Даян түмний эх” саарал азарга 2001 онд улсын наадамд дөрвөлж, 2002 онд хавчиг соёолон түрүүлэн ид хаваа гайхуулж байлаа. Түүнчлэн   2004-2005 оны “Дүнжингаравын хурд” хаврын бүсийн уралдаан, Багануур-БагаХэнтий бүсийн хаврын уралдаануудад түрүүлж байсан энэ цагийн эгэлгүй хурдан буян билээ. Сайн хүлэг эзнээ хайж явдаг гэдэг. Саарал азарга чухам тийм тохиолоор Ц.Цэнгэлтэй уулзаж, халхын цуут хүлгийн нэгээр тодорсон билээ.

Ш.Бадамаа