ММСУХ Адууны хөгжлийн зөвлөлтэй боллоо

ММСУХ-ноос хэдэн жилийн өмнөөс ХААИС-ийн эрдэмтэн багш нартай судалгааны шинжилгээний тал дээр хамтран ажиллахаар төлөвлөж ирсэн нь өнөөдөр биеллээ олж байна. Өнөөдөр ХААИС дээр ММСУХ-ны Ерөнхийлөгч Цогтын Батсайхан, ХААИС-ийн захирал Т.Хэруга нар хамтран ажиллах санамж бичигт гарын үсэг зурснаар хамтын ажиллагаагаа эхлүүлж байгаагаа албан ёсоор мэдэгдлээ. Хамтын ажиллагааны хүрээнд “Адууны хөгжлийн зөвлөл” байгуулж, тус зөвлөлийн бүрэлдэхүүнд нь тус сургуулийн эрдэмтэн, судлаачдын баг ажиллах юм байна.  

Энэхүү санамж бичгийн зорилго нь:  Монгол адуу судлалын төвийг үүсгэн байгуулах, тус төвөөр дамжуулан Монгол адууны онцлог, стандартыг тогтоох, адууны аж ахуйн хөгжлийг шинэ түвшинд гаргах, дэлхийн адуу судлалын шинжлэх ухаанд Монгол адуу судлалыг бий болгох, Монголын морин спорт, хурдан морины наадам цэнгүүнийг Олон улсын жишигт хүргэхэд чиглэсэн Шинжлэх ухааны үндэслэл бүхий судалгаа, шинжилгээ хийх, түүнийг удирдах, нийтэд сурталчлан  таниулахад талууд хамтран үр ашигтай ажиллахад оршино.

ММСУХ, Адууны хөгжлийн зөвлөлийн хамтын ажиллагааны үр дүнд дараах ажлууд хийгдэхээр төлөвлөгдөж байгаа гэнэ. Үүнд:

            -Монгол адуу, нутагшсан монгол адуу, эрлийз монгол адууны үүлдэр, угсааг шинжлэх ухааны үндэслэлд тулгуурлан генетик нөөцийг судлан тогтоож, үнэлэлт, дүгнэлт өгөх;

  • Монгол адууны онцлог, стандарт, эталоныг дэлхийн бусад орнуудын судалгааны үр дүнтэй харьцуулан тогтоох;
  • Монгол адууны аж ахуйн хөгжлийн зүй тогтол, онцлогийг Дэлхийн адуу судлал, аж ахуйн онцлог, хөгжилтэй харьцуулан судлах;
  • Монгол адууны генетик чадвар, биологи, эдийн засгийн үнэлэмж, үр ашгийг тогтоох чиглэлээр эрдэм шинжилгээ, үйлдвэрлэл, бизнесийн хамтын ажиллагааг өргөжүүлэх;
  • Монгол адууны эрүүл ахуй, мал эмнэлгийн цогц үйлчилгээг үе шаттайгаар хөгжүүлэх; 
  •   Монгол адууны өв соёл, үндэсний бахархал, тусгаар тогнолын бэлгэ тэмдэг болох талаар уламжлал, шинэчлэлийг шинжлэх ухааны үндэслэлтэй удирдан зохион байгуулж, түгээн дэлгэрүүлэх;  
  • Монголын уламжлалт морин уралдаан, морин спортын хөгжил, онцлог, цаашдын чиг хандлагыг тогтоох;
  • Монголын хурдан морины тэжээллэг, эрүүл ахуй, спортын мал эмнэлгийг төрөлжүүлэн хөгжүүлэх;
  • Монголын морин спортыг олон улсын түвшинд хүргэхэд судалгаа, сургалт, санхүү, эдийн засаг, эрх зүйн орчинг боловсронгуй болгох.
  • Энэхүү санамж бичгийн зорилгыг хэрэгжүүлэх, үйл ажиллагааг зохион байгуулах зорилгоор хоёр тал хамтарсан ажлын хэсэг, мэргэжлийн зөвлөл байгуулж ажиллана.

 

0 Сэтгэгдэл

ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.

    Сэтгэгдэл бичигдээгүй байна