П.Сэргэлэн: Булган аймгийн МСУХ үнэхээр сайн ажилладаг

ММСУХ хэмээх өнөр бүлийн өдөр тутмын үйл ажиллагааг зохион байгуулж байдаг Ерөнхий нарийн бичгийн дарга Пүрэвийн Сэргэлэнгээс хангайн бүсийн уралдааны талаарх сэтгэгдлийг нь хуваалцлаа. Тэрээр бидний асуултанд ийн хариулсан юм.
-Засгийн газрын тогтоолт зуны бүсийн таван уралдаан болсон. Булган аймагт болсон хангайн бүсийн уралдаанд ММСУХ-ны тэргүүлэгчид зөвлөх, хяналт тавих үүрэгтэйгээр оролцсон уу?
-Оролцсоон. ММСУХ-ны тэргүүлэгч, Тод манлай уяач Батсайхан, Манлай уяач Хишигжаргал, Мэндбаяр, Даш-Өлзий нарын төлөөлөгчид очиж, оролцсон. Булган аймагт болсон хангайн бүсийн уралдаан зохион байгуулалт сайтай, дэг журамтай сайхан уралдаан болсон хэмээн уяачид, хурдан морины зүтгэлтнүүд дүгнэж байна лээ. Бид ч бас санал нэгтэй байгаа.
-Орон нутгийн удирдлагууд бүсийн уралдааныг цуцалж өгөх тухай хүсэлтийг Засгийн газарт хүргүүлсэн байсан. Өмнө нь ийм тохиолдол гарч байсан уу?
-Үгүй ээ. Булган аймгийн Засаг дарга гантай байгаа учраас бүсийн уралдаан зохион байгуулах боломжгүй гэдгээ Засгийн газрын тэргүүнд уламжилсан байсан. Энэ тухай ММСУХ-нд мэдэгдэхэд нь “хангайн бүсийн уралдаан бол зөвхөн Булган аймгийн хэмжээний уралдаан биш. Ойролцоо аймаг, сумдын уяачид ирж оролцдог улсын хэмжээний томоохон наадам” гэдгийг уламжилсан. Та бүхэн мэдэх байх.1995 онд Завхан аймагт Сар хайрханы даншиг нэртэйгээр Монголын анхны бүсийн уралдаан зохион байгуулагдаж, тэр жилээ Өвөрхангай аймгийн Есөнзүйл суманд зуны бүсийн наадам болж байсан. Түүнээс хойш үндсэндээ 20 жил Засгийн газрын тогтоолт бүсчилсэн уралдааныг зохион байгуулж байна. Тэгэхээр энэ уралдааныг цуцлах боломжгүй юм. Тэгээд ч ганц Булган аймагт бус нийт орон даяар зуншлага тааруу байсан шүү дээ. Бидний саналыг Булган аймгийн МСУХ-ныхон маань орон нутгийнхаа дарга удирдлагуудад танилцуулж, зөвшөөрлийг авсан байна лээ. Хэдийгээр шийдвэр нэлээд тулгамдуу гарсан ч  бэлтгэл сайн хангагдсан. Бат-Эрдэнэ тэргүүнтэй Булган аймгийн МСУХ-ныхон  маань ажлаа мэддэг, ажилдаа эзэн болсон гэдгээ харуулж, богино хугацаанд зохион байгуулалт сайтай, сайхан уралдааныг хийж чадсан байна лээ. Би үүнд их талархаж байгаа.
-Бүсийн уралдааны эрхийг олгохдоо ямар хүчин зүйлүүдийг харгалзаж үздэг юм бэ?
-Баруун, зүүн, хангай, говь, төв гэсэн таван бүс нутагт уралдаан зохион байгуулдаг. Өөрөөр хэлбэл тухайн бүсийн аймгууд ээлжлэн уралдааныг зохион байгуулдаг. Үүний хажуугаар тав, 10 жилийн давтамжтай зохиогддог уралдаанууд бий. Энэ бүхнийг харгалзана. Тэгээд тухайн аймгийн удирдлага болон уяачдын холбооноос ирүүлсэн хүсэлтийг үндэслэн ММСУХ-ны тэргүүлэгчдийн хурлаар авч хэлэлцээд, саналаа Засгийн газарт хүргүүлж, батлуулдаг.
-Тэгэхээр тухайн аймгийн ЗДТГ, уяачдын холбооноос эхлээд хүсэлт ирсэн байх нь ээ дээ?
-Тиймээ. Орон нутгаас ирсэн албан хүсэлтийг үндэслэн уралдааны хуваарийг гаргаж, түүнийгээ Засгийн газарт өргөн мэдүүлж, батлуулдаг. Бүсийн уралдааныг тухайн аймгийн МСУХ, Засаг даргын томилсон салбар комисс хамтран зохион байгуулдаг. ММСУХ-ны хувьд бол монголын хурдан морины дүрмийн хүрээнд уралдааны зохион байгуулалтанд хяналт тавьж нэгдсэн удирдлагаар хангах үүрэгтэй.
-Өнөө жилийн баруун бүсийн уралдаан Говь-Алтай аймагт болно гэлцэж байсан ч Увс аймагт зохион байгуулагдсан. 90 жилийн ой гэдгийг харгалзаж үзсэн хэрэг үү?
-Уг нь дарааллаараа бол Говь-Алтай аймагт зохиогдох ёстой байсан. Гэтэл Засгийн газрын хуралдаанаар хэлэлцээд олон том наадам давхцуулахгүй байх үүднээс Увс аймагт зохион байгуулах тухай шийдвэр гарсан байсан. Ер нь сүүлийн үед холбооноос явуулсан тогтоол шийдвэрүүдийг Засгийн газрын хуралдаанаар өөрчлөх нь цөөнгүй  болоод байгаа. 
-Засгийн газрын тогтоолт бүсийн наадмыг тааруу зохион байгуулсан аймгуудтай ямар нэг байдлаар хариуцлага тооцдог уу? Жишээлбэл бүсийн уралдааны  эрхийг өгөхгүй өнжөөх гэх мэтээр...?
-Арга хэмжээ авна. Уралдааны бэлтгэл явцтай нь танилцана. Өмнө нь бүсийн уралдааныг зохион байгуулахдаа гаргасан алдаа дутагдлыг нь хэлж залруулна. Тэр ч утгаараа холбооны тэргүүлэгчид ажилладаг юм. Жишээ нь өмнө нь Булганд хаврын бүсийн уралдаан болоход би өөрөө очиж уралдааных нь замыг үзэж байсан.
-Ерөнхий нарийн бичгийн дарга Булган аймгийн МСУХ-нд ямар дүн тавьдаг вэ? Шударгаар хариулахыг хүсч байна?
-Булган  аймгийн МСУХ үнэхээр сайн ажилладаг. МУ-ын Манлай уяач Мэндбаяр ах маань хичээл зүтгэл гаргаад сайн ажилладаг байсан. Түүний дараа Бат-Эрдэнэ, Лхагвасүндэв, Дагий нар маань аваад бүр илүү сайн ажиллаж байгаа. Би энд олон хүний нэрийг хэлж амжихгүй ч эдний баг маш сайн ажилладаг гэдгийг хэлж чадна. Ялангуяа дэлхийн дээд амжилтанд бүртгүүлэх Гиннесийн уралдаанд маш их идэвхтэй оролцсон гэдгийг зориуд цохон тэмдэглэмээр байна. Булган аймгаас ирсэн уяачид дангаараа нэг гараа болж 500 морь уралдуулсан шүү дээ. Энэ дашрамд тэрхүү үйл ажиллагаанд хичээл зүтгэл сэтгэл гаргасан Булган аймгийн МСУХ-ны тэргүүн Ж.Бат-Эрдэнэ болон удирдлагууд, МУ-ын Манлай уяач Д.Хишигжаргал нартаа дахин талархлаа илэрхийлье. Би Булганы уяачдын холбоог ойлголцол сайтай сайн баг гэж хардаг. Тэр ч утгаараа богино хугацаанд бүсийн уралдаан зохион байгуулахад ямар нэг байдлаар санаа зовниогүй. Тус холбоо 2014 онд МУ-ын шилдэг аймгийн салбар холбоогоор шалгарсаны зэрэгцээ Дашинчилэн, Баяннуур, Хишиг-Өндөр сумдын холбоо мөн   ажил үйлсээрээ тэргүүлж байсан юм.
-Бидний хүсэлтийг хүлээн авч, цаг гаргасанд баярлалаа.
"Булганхангайн хурд" сэтгүүл №01