МУИС-д барилдаан боллоо

МУИС-ийн МХСС-ийн Эх бичиг-Алтай судлалын тэнхимийн дэргэдэх Монгол бичиг соёлын Хос Уянга нэгдлийн 12 жилийн ойд зориулсан бөхийн барилдаан боллоо. Барилдаанд утга зохиолын доктарант М.Энхбаатар, Утга зохиолын ажилтны 4 дүгээр ангийн оюутан Т.Батбаяр, Монгол хэл уран зохиолын багшийн 4 дүгээр ангийн оюутан Г.Нямбалдан, Ардын урлаг судлалын 4 дүгээр ангийн оюутан С.Равжиртогтох нараар манлайлуулсан 14 залуу зодоглолоо.
Барилдаан өрсөлдөөнтэй, хурдан шуурхай сайхан болж өндөрлөв. Дүн гарахад Сүхбаатар аймгийн Мөнххаан сумын харьяат, Монгол хэл, эх бичиг судлалын 2 дугаар ангийн оюутан Лхагвадоржийн Алтантөр 13 даваатайгаар түрүү бөхөөр тодорлоо. Түүний хувьд сум орон нутагтаа сайн барилддаг, бөхийн хийц галбир сайхантай өсөх ирээдүйтэй залуу билээ.
Адил 11 даваа авсан 3 бөхийн хоорондын барилдааны дүнг харахад Г.Нямбалдан, С.Равжиртогтох, Л.Рэнцэн-Очир нар гурав биенээ тойрч давсан тул 2-4 дүгээр байрын төлөө дахин барилдлаа. Гурван залуу дахин барилдахад Өвөрхангай аймгийн Баянгол сумын харьяат, Монгол хэл уран зохиолын багшийн 4 дүгээр ангийн оюутан, Ганбадрахын Нямбалдан хоёуланг шороодуулж үзүүр бөхөөр тодров. Түүний хувьд чөлөөт бөхөөр барилдаж байсан агаад уран гоё өмсөх, тавхайлдах, этэх, хөлд орж дэрлэж дарах, хутгах мэхүүдийг угсруулан хийж үзэгчдийг баясгасаар ийн үзүүрлэвэй.
Өмнөх барилдаанд үзүүрлэж байсан, Завхан аймгийн Дөрвөлжин сумын харьяат, ардын урлаг судлалын 4 дүгээр ангийн оюутан Сүхбатын Равжиртогтох энэ удаа мөн амжилтаа давтаж гутгаар байрт шалгарлаа.
Төв аймгийн Баянцагаан сумын харьяат, Монгол хэл уран зохиолын багшийн 1 б ангийн оюутан, Лайжинхандын Рэнцэн-Очир хийгүй сайхан барилдсаар дөтгөөр байрт оров. Түүний хувьд өмнөх барилдаанд уран гараа дэвээний шагналыг хүртэж байсан билээ.
Тавдугаар байрт Хөвсгөл аймгийн Шинэ-Идэр сумын харьяат, утга зохиолын доктарант Мижиддоржийн Энхбаатар шалгарлаа. Тэрээр энэ өдөр түрүү бөхийг шороодуулсан ганц бөх нь байлаа.
Удаах байруудад Улаанбаатар хотын Багануур дүүргийн харьяат, Утга зохиолын ажилтны 2 дугаар ангийн оюутан Нямдаваагийн Анхбаяр, Увс аймгийн Бөхмөрөн сумын харьяат, Утга зохиолын ажилтны дөрөвдүгээр ангийн оюутан Түмэндэмбэрэлийн Батбаяр, Архангай аймгийн Хотонт сумын харьяат, Монгол хэл уран зохиолын багшийн 2 дугаар ангийн оюутан Удвалцэцэгийн Жамбалнагва, Өвөрхангай аймгийн Бат-Өлзий сумын харьяат, Монгол хэл уран зохиолын багшийн 3 дугаар ангийн оюутан, Базарбандийн Жамбалсанжид, Ховд аймгийн Манхан сумын харьяат, Монгол хэл уран зохиолын багшийн 2 дугаар ангийн оюутан, Мөнхцолын Батбаяр, Завхан аймгийн Шилүүстэй сумын харьяат, Утга зохиолын ажилтны 3 дугаар ангийн оюутан Баярсайханы Самбуу, Төв аймгийн Эрдэнэсант сумын харьяат, Монгол хэл уран зохиолын багшийн 2 дугаар ангийн оюутан Батчулууны Нямдоо, Увс аймгийн Наранбулаг сумын харьяат, Монгол хэл уэх бичиг судлалын 1 дүгээр ангийн оюутан Балдандоржийн Төвдэлгэр, Дархан-Уул аймгийн Дархан сумын харьяат, Монгол хэл уран зохиолын багшийн 1 в ангийн оюутан Баатарцогтын Нямаа нар шалгарлаа.
Энэ өдөр Л.Алтантөрийн хонгодож цацах, доктарант М.Энхбаатарын давуулж хутгах, өмсөх, Г.Нямбалдангийн хөлд орох, хутгах, тавхайлдах, Н.Анхбаярын давуулж гуядах, Т.Батбаярын хонгодох, Л.Рэнцэн-Очирын мордох мэхүүд аргагүй ялгарч байлаа. Мөн Н.Анхбаярын гараа дэвээ, Б.Нямаа, М.Батбаяр, Б.Жамбалсанжид нарын уран мэх, хурц хөдөлгөөн барилдааны гол чимэг нь байв.
Барилдааныг хүндэтгэж барилдсан нийт залуус болоод чин сэтгэлээсээ дэмжсэн бүх хүмүүстээ талархал илэрхийлье.
МУИС-ийн оюутан Т.Түмэндэмбэрэл