Сумын Алдарт уяач Ц.Батсайхан: Сумынхаа гайгүй азарганы үр төлүүдээс авч байгаа

-Могой жилийн амжилтуудаас тань яриагаа эхэлье?
-Хүүхэд морь мэнд сайхан наадлаа даа. Бүрэгхангай сумын 90 жилийн ойд шүдлэн, хязаалан мордуулж, дундуур давхиулсан. Найман сар гаргаад болсон болохоор өтгөн наадам болсоон.
-Уяачийн эрдэм ухаанд шамдаад хэдэн жилийн нүүр үзэж байна?
-2009 оноос эхлэн морь сонирхон уяж эхэлсэн. Булган аймгийн Бүрэгхангай сумын харьяат манай ээжийн дүү болох аймгийн Алдарт уяач Наранцацралт гэдэг хүн надад анх нэг хээр үрээ бэлгэнд өгч. Тэр нь 2009 онд хязааландаа сумынхаа наадамд айрагдаж, тэгээд л түүнээс хойш  ганц нэг морь авч анх эхэлсэн дээ.
-Бэлэгний хээр нэлээд хурдалсан юмаа даа?
-Наймдугаар сарын 8-нд болсон бооцоот уралдаанд гурваар давхиад, хойтон зун нь соёолон үрээ аравдугаар сарын нэгэнд болсон Ахмадын баярт аман хүзүүдсэн. Түүний маргааш /аравдугаар сарын 2-нд/ Хишиг-Өндөр суманд болсон уралдаанд бас айрагдсан. Хээр азарга маань над дээр ирснээсээ дөрөв айрагдаж нэг хэсэг өнжөөсөн. Энэ жилээс уянаа.
-Залуу уяачийн урмыг тэтгэсэн өөр ямар хурдан хүлгэд байна?
-2009 оныхоо намар Булган аймгийн Бүрэгхангай сумын харьяат, аймгийн Алдарт уяач Гүнсэнбазар гэдэг хүнээс хар шүдлэн авсан. Хар үрээ даагандаа их хурдан байж, арваад медальтай болсон. Над дээр ирээд бас ганц нэг айрагдсан. Одоо азарга болчихсон уягдаж байгаа. 2009 оны намар Заамар сумын харьяат, сумын Алдарт уяач Бандихүү гэдэг хүнээс хүрэн даага авсан. Одоо бас азарга болчихсон. 2011 онд манай сумын Алдарт уяач Аюушийн Ганболд гэдэг хүнээс хээр үрээ авсан. Хээр үрээ шүдлэндээ сумандаа түрүүлчихсэн байсан юм. Би хязааланд нь аваад сумандаа түрүүлгэж, хоёр хоногийн дараа Гурванбулаг сумын наадамд бас түрүүлгэсэн. Соёолонд нь давхиулаагүй. Энэ жил хавчиг морь уягдаж байгаа.
-Хэдэн онд сумын Алдарт уяач цол хүртсэн бэ?
-Өнгөрсөн жил Гиннест бүртгүүлэх уралдаанд амжилттай оролцоод энэ жил авсан. Ер нь дөхчихсөн байсан юмаа. Сумын наадмаас хоёр түрүү, 3-4 айраг авсан. Миний морийг аймгийн Алдарт уяач А.Ганболд уядаг байсан юм. Ноднингоос л би өөрөө бие даан өөрөө үзэж байна. Энэ өвөл адууныхаа жүчээг дуусгаад хоёр гурван насны морь тэжээж байна. Хэдийгээр туслах хүн байдаг ч морь уях их л ажилтай юм.
-Залуучууд моринд олноор орж ирж байна. Юу тэднийг ингэтэл нь татдаг юм бол. Жишээлбэл, таны хувьд?
-Яг тэрнээс болоод гэж хэлж мэдэхгүй л байна. Ер нь морь сонирхсон хүн холдож чаддаггүй юм билээ. Хэдийгээр моринд хожуу орсон ч гурван хүүдээ гайгүй адуу үлдээчих юмсан гэсэн зорилго өвөртлөөд л явж байна даа. Тэгж бодоод сүүлийн үед зүүн талаас хэдэн гүү авсан.Сумынхаа сайн азарганы төл байдас, гүү ч авсан. Болох байлгүй дээ.
-Хаа сайгүй л зүүн талын адуугаар наадаж байна?
-Манай суманд ч гэсэн айрагдаж, түрүүлж байгаа нь дандаа л зүүн талын адуунууд байна. Миний хувьд уралдах адуу аваагүй ээ. Түүний оронд сумынхаа гайгүй азарганы үр төлүүдээс авч байгаа. Жишээлбэл, улсын Алдарт уяач Эрдэнэбатын буурал халзангийн төл болон аймгийн Алдарт Гүнсэнбазарын адуунаас авсан.
-2014 онд Дашинчилэн сумын 90 жилийн ой тохиож байгаа юм байна. Нутгийн дэвжээг хамгаалах үүрэгтээ хэр бэлтгэж байна?
-Манайхан дор бүрнээ л бэлтгэж байх шиг байна. Би 7-8 юм уяж байгаа. Сумын маань ой өргөн дэлгэр сайхан болох байхаа. 
-Амжилт хүсье. Уясан хүлэг тань хурдан байх болтугай.
-Баярлалаа. Танай сэтгүүлийн хамт олонд ажлын өндөр амжилт хүсье.

А.Мөнх