ЗҮҮН бүсийн хурдан хүлгэд

Дэлхийн адууны баяр, "Монгол морь-3000" уралдаанд оролцсон 4249 алтан тууртыг Төв, Булган, Зүүн, Баруун, Хангай, Улаанбаатар гэсэн зургаан бүсэд хуваан уралдуулж бүс тус бүрийн түрүү айргийн хүлгэдийг тодруулсан билээ. Хурдны өлгий зүүн аймгуудын  ажнайгууд шандас шалгасан зүүн бүсээс 435  хүлэг  гараанаас гарсан юм.
1. Дундговь аймгийн Луус сумын уугуул, аймгийн Алдарт уяач Б. Чулуунбаатарын өсгий цагаан хар. "Монгол морь-3000" уралдаанд оролцсон 4249 хүлгээс 19-т хурдалж, зүүн бүсдээ тэргүүлсэн хар морь 2012 онд Өмнөговь аймгийн баяр наадамд түрүүлж, өнөө жил Дундговь аймгийн хаврын бүсийн уралдаанд мөн магнайлсан хурдан хүлэг билээ.
2. Дундговь аймгийн Хулд сумын уугуул, аймгийн Алдарт уяач С. Мөнхбатын хүрэн. Сүхбаатар аймгийн Дарьганга сумын унаган хүлэг хүрэн морь Дундговийн 70 жилийн ойд аман хүзүүдэн, шигшмэл морьдын "Их хурд-6" уралдаан  болон Завхан аймгийн 90 жилийн ойд тус тус зургаад хурдалсан юм.
3. Дундговь аймгийн Луус сумын уугуул, аймгийн Алдарт уяач Ч.Алтангарьдын сартай хээр. Энэ бүсийн түрүү хүлэг Ч.Алтангарьдын сартай хээр  хоёр нэг айлын адуунууд бөгөөд уяа сойлгыг нь Луус сумын уугуул, аймгийн Алдарт уяач Ч. Алтансүх тааруулдаг аж.
4. Дундговь аймгийн Дэрэн сумын уугуул Д.Өлзийн цагаан "Монгол морь-3000" уралдаанд оролцсон 4249 хүлгэдээс 31-д хурдалж,  бүсдээ айргийн дөрөвт багтсан юм.
5. Хэнтий аймгийн Баянхутаг сумын уугуул, "Хүй мандал" галын уяач Ц. Амарсайханы хонгор. 2011 онд Хэнтий аймгийн баяр наадамд айрагдаж байсан энэ хүлэг 4249 мориноос 34-д хурдалсан.
А.Мөнх