МУИС-ийн аварга шалгаруулах барилдаан боллоо

Монгол Улсын Их сургуулийн оюутны аварга шалгаруулах үндэсний бөхийн барилдаан сайхан боллоо. Барилдаанд с.з Ш.Базарсад, Б.Содхүү, М.Мөнгөнгадас, П.Сандагдорж нарын тэргүүтэй 28 бөх зодоглон барилдлаа. МУИС-аас улсын гарди Н.Ганбаатар, улсын харцага А.Цацабшир, улсын начин Д.Лхагвадорж, аймгийн арслан Т.Сүрэнжав, Т.Пүрэвсүрэн  нарын олон шилдэг бөх тодрон гарсан билээ.
Бөхийн барилдааны нэгийн даваанд манлайлсан заанууд учраа бөхчүүдээ тун ч төвөггүй шороодуулсан бол Газарзүй геологийн сургуулийн оюутан Г.Алтангэрэл Биологийн сургуулийн С.Ням-Очирыг сууж өмсөх мэхээр давж үзэгчдийг шуугиулав. Мөн хоёрын давааны эхэнд зүүний магнай сумын заан Ш.Базарсад з.б С.Батзоригийг баруун талдаа уран гоё өмсөж давлаа.
Сүүлийн 7 бөхийг тойргоор барилдуулаж дүнг гаргалаа.
Тэргүүн байр:
Төв аймгийн Жаргалант сумын харьяат, МУИС-ийн Бизнесийн сургуулийн оюутан, сумын заан Батмөнхийн Содхүү 5 давсан амжилтаар шалгарав. Б.Содхүүгийн хувьд МБӨ-д болдог сумын заануудын барилдаанд тун сайн хүч үздэг бөгөөд саяхан болсон Төв аймгийн аварга шалгаруулах барилдааны залуучуудын ангилалд тэргүүлсэн ирээдүйтэй шилдэг залуу билээ.
Дэд байр:
Булган аймгийн Дашинчилэн сумын харьяат, МУИС-ийн Бизнесийн сургуулийн оюутан, сумын заан Мөнхбатын Мөнгөнгадас Б.Содхүүгийн адил 5 давсан ч түүнд унасан учир ийн байр ухарлаа. Биеэр жижиг боловч уран хурц барилдаантай энэ залуу өнгөрсөн жил аймгийн арслан Т.Пүрэвсүрэнтэй үлдэж мөн үзүүр булааж байсан билээ.
Гутгаар байр:
Төв аймгийн Бүрэн сумын харьяат, МУИС-ийн Химийн сургуулийн оюутан, сумын заан Ширээбазарын Базарсад. Бөхийн өргөөнд ч тэр, наадмын дэвжээнд ч тэр, МУИС-ийн зааланд ч тэр өмсөх мэхийг тун даацтай хийж буй энэ залуу аймгийн заан Б.Ширээбазарын бага хүү билээ. МБӨ-д 2, 3 дугаар сард болсон сумын заануудын барилдаанд 2-3 давахдаа дархан өмсөх мэхээрээ бүх даваагаа авсан энэ залуу өмнө нь ч сургуулийн аварга шалгаруулах барилдаандаа шагналт байрт шалгарч байсан билээ.
Дөтгөөр байр:
Завхан аймгийн Яруу сумын харьяат, МУИС-ийн Биологийн сургуулийн оюутан Б.Энхжаргал. Бөхийн хийц галбир сайхантай, тэвчээртэй барилдаантай энэ залуу цаашид сайн барилдаж цолд хүрэх бүрэн бололцоотой харагдаж байв.
Тавдугаар байр:
Булган аймгийн Гурванбулаг сумын харьяат, МУИС-ийн Бизнесийн сургуулийн оюутан8 сумын заан Пүрэвжавын Сандагдорж. Улсын гарди И.Доржсамбуу, у.ө.и.н И.Ёндонсамбуу, а.а Д.Амаржаргал, а.х С.Чулуунхүү, а.н П.Даваадорж нарын удамт бөхчүүдийн залгамж тэрээр ах нарынхаа адил сэрвүү барьцнаас хонгодох, лав барьцнаас мушгих, тонгорох мэхээ даалгасаар 5 дугаар байрт шалгарлаа. Хайнга барилдалгүй тооцоотой барилдсан бол байр урагшлах боломж дүүрэн байлаа.
Зургадугаар байр:
Булган аймгийн Дашинчилэн сумын харьяат, МУИС-ийн Математик компьютерийн сургуулийн оюутан Г.Амгаланбаатар. Сургуулийнхаа барилдаанд сүүлийн хэдэн жил тун сайн барилдаж буй энэ залуу ирэх зунаас цолд хүрэх биз ээ.
Долдугаар байр:
Төв аймгийн Баянцагаан сумын харьяат, МУИС-ийн Физик электроникийн сургуулийн оюутан, сумын начин Батаагийн Пунцаг-Ёндон. Өнгөрсөн намар 1 дүгээр ангийнхны барилдаандаа тэргүүлсэн тэрээр энэ барилдаанд долдугаар байр эзлэв.
Ийнхүү улсын манлай сургуулийн манлай бөхчүүд тодорлоо.
МУИС-ийн оюутан Т.Түмэндэмбэрэл