Их нас Саран хонгор

Их нас Саран хонгор

Амжилтын цуваа:
2008 оны “Заамарын хурд” бүсийн уралдааны айргийн тав
2010 он буюу АХ-ын 89 жилийн ойн баяр наадмын айргийн гурав
Шигшмэл морьдын “Их хурд-5” уралдааны аман хүзүү
Их Монгол улс байгуулагдсаны 804-н жилийн ойн улсын баяр наадмын хурдан их насны морьдын тааврыг эвдсэн нэгэн хүлэг бол Өвөрхангай аймгийн Хайрхандулаан сумын уугуул М.Эрхэмбаярын“Саран” хэмээх хонгор морь байсан юм. Алдарт уяач Т.Энхтайван Хэнтий аймгийн Өмнөдэлгэр сумын уугуул Отгонбаатар гэдэг залуугаас “Гал хүрэн” хэмээх хурдан буян авч байсан нь өнөө жил төрийнхөө их наадамд айрагдаад буй Саран хонгорын дүү юм. М.Эрхэмбаяр, Алдарт уяач Т.Энхтайван нар эртнээс гэмгүй сайхан нөхөрлөсөн андууд. Тиймдээ ч сумынхаа наадамд дөрвөнтөө айрагдсан Отгонбаатарын хонгорыг онцлон найздаа “найрч” өгчээ. Ийнхүү арван настай хонгор морь 2007 оноос М.Эрхэмбаярын нэрээр овоглон хүлгэдийн тоосонд хурдлах болсон билээ. 2008 оны төрийн их баяр наадамд шандсаа сорин 39-д давхиж, хэдхэн хоногийн дараа болсон “Заамарын хурд-2008 ” бүсийн уралдаанд айргийн тавд хурдлан уясан эзэн, унасан хүүхэд, хурсан олноо баярлууллаа. АХ-ын 88-н жил, Их Монгол улс байгуулагдсаны 803-н жилийн ойн улсын баяр наадамд хонгор морины амжилт урагшилж Галхүрэн дүүгийнхээ ар дээр 20-т давхин, “Дорнод-2009” зүүн бүсийн уралдаанд19-өөр хурдалсан билээ.
Жижигхэн сартай хонгор моринд шинэ эзэн нь“Саран” хэмээх нэр хайрласан бөгөөд Налайхын урд гол, Хайрханы өвөрт уягдаж, сунгаа болгондоо өнгөлж эзнийхээ сэтгэлд найдварын оч асааж байсан хүлэг 2010 онд төрийнхөө их баяр наадамд айргийн гуравт, Шигшмэл хурдан хүлгүүдийн “Их хурд-V” уралдаанд аман хүзүүнд хурдлан өнөө цагийн хурдан хүлгэдийн нэгээр хүлээн зөвшөөрөгдсөн юм.