Алтайчууд 70 жилийн ойгоо тэмдэглэлээ

Одоогоос 70 жилийн тэртээ Алтай хотын Хантайширын нурууны ард ханаа шийрлэн байгуулагдсан түүхтэй.   Ийнхүү олон жилийн настай Алтайчууд ойн баяраар эрийн гурван наадмаараа наадлаа. Улс аймгийн цолтой 128 бөх уран мэх, ухаан хүчээ уралдуулан барилдаж улсын Заан Б.Соронзонболд түрүүлэн, аймгийн Арслан Д.Цэрэндаваа үзүүрлэжээ. Харин хурдан морьдын уралдааны их насанд Есөнбулаг сумын уяач Д.Баярбатын хул, азарганд Дэлгэр сумын Л.Чагнаадоржийн хээр, соёолонд Шарга сумын Д.Дорждагвын хүрэн, хязааланд Есөнбулаг сумын Х.Дарханбаатарын хээр, шүдлэнд Тайшир сумын С. Гүррагчаагийн халтар, дааганд Бугат сумын Ш.Энхтөрийн хээр тус тус түрүүлж  торгон жолоогоо өргүүллээ.  Тэгвэл сурын харваанд 52 эрхий мэргэн харваачид өрсөлдөж цэц мэргээ сорьсоноос Улсын мэргэн, спортын мастер Б.Баярсайхан, эмэгтэй харваачдаас спортын мастер С.Цэрэнбуу нар түрүүллээ.
Хүүхдийн барилдаанд Есөнбулаг сумын  Д.Балжинням түрүүлж, Төгрөг сумын Ц.Лхагва-Очир үзүүрлэсэн бол сурын харваанд Баян-Уул сумын сурагч Б.Ганболд, Р.Өлзийбуян нар тэргүүллээ. Ийнхүү Алтайчуудын наадам дуутай хууртай өргөн дэлгэр болж өндөрлөжээ.