МУ-ын Арслан П.Бүрэнтөгс нутагтаа амарч байна

Бүтэн жилээ даадаг наадмын сонин сайхан өдгөө ч үргэлжилсээр л. Их Монгол улс байгуулагдсаны 806, Ардын хувьсгалын 91 жилийн ойн Үндэсний их баяр наадмын хүчит бөхийн барилдаанд Увс аймгийн харьяат, аймгийн арслан П.Бүрэнтөгс түрүүлж “Улсын арслан” цолны эзэн болсон билээ. Тэрээр "Увс нуур” бөхийн галд гарсан цагаасаа эхлэн бэлтгэлээ сайн базааж байсан ч наадмын өмнө мөрөө мулталж бусдыгаа бодвол эрт буужээ. Тухайн үед Г.Жамсран багшдаа: “Багш аа, би аварга болно оо” хэмээсэн нь оргүй үг биш байсан тухай багш нь ярих юм билээ. Ер нь Бүрэнтөгсийг багшаас нь эхлээд Увсын аваргууд юм дуулгах хүү гэж “шинжсэн” байдаг юм билээ. Увс аймгийн Улсын аварга малчин Пүрэвийн тав дахь хүү болсон тэрээр багадаа үеийн хөвгүүдийнхээ л адилаар дээлээ уралцаж өссөн нэгэн. Хэзээнээсээ том биетэй тэдний удмынхан дунд  сум орон нутагтаа гурван даваатай эрчүүд байсан гэх. Ийнхүү бөхийн амтанд хорхойссон хүүд Монгол бөхийн шинж буйг Увс аймгийн Улаангом сумын “Эрдэм билиг” сургуулийн багш Бат-Очир олж харснаар бүх зүйл эхэлжээ. Харин бөхийн эрдмийн А үсгийг улсын харцага Ө.Бат-Орших зааж байсан тухай арслан түүх сөхөх юм билээ.Шинэхэн цолондоо нэг л дасахгүй байна, болно доо хэмээх тэрээр саяхан болсон  Хан-Хөхий уулынхаа наадамд анх удаа шинэ цолоо дуудуулан зодоглосон. Ямартаа ч шинэ цолоо төрсөн нутагтаа анх удаа дуудуулахаар яарч байгаагаа сэтгэл догдлон өгүүлсэн Арслан одоо нутагтаа амарч байна.