Нийслэлийн Алдарт уяач Д.Дүйнхэржав: Хүрэн морь намайг их баярлуулсан даа

-Таны хувьд энэ жилийн наадмын өнгө хэр байна даа?
-Нар хур тэгширсэн сайхан наадам болж байнаа. Төв аймгийн наадамд ихэнх морио уралдуулсан учраас төрийн наадамдаа хоёр морьтой ирж шандас сорьлоо. Морьд маань ядарч зүдэрсэнгүй сайхан явж ирлээ.
-Та хүрэн мориныхоо өмнөх амжилтуудаас дурдаач?
-Намайг мөн ч олон баярлуулсан адуу даа. Бүсийн наадмуудад хурдан байлаа. Төв аймгийн баяр наадамд айрагдаж байсан. Говь-Алтайн шигшмэл хурдад айрагдсан. Улс бүсийн наадмуудаас гурван айрагтай байгаа юм. Миний хүрэн морь чинь том бага наадмуудад 30 гаруй айраг түрүү авсан. Энэ жил 9 настай адуу.
-Хаанахын удам угшилтай адуу юм бол?
-Би  Говь-Алтай аймгийн Дарви сумын уугуул. Гадаад яаманд их олон жил жолооч хийсэн. Энэ хүрэн бол миний унаган адуу юм. Би ерөөсөө унаган адуугаараа наадаж байна даа.
-Та хичнээн жил морь уяж байна вэ? Нийслэлийн Алдарт уяач цолоо хэдэн онд хүртсэн юм бэ?
-Би чинь 2006 оноос өөрөө гардаж уядаг болсон их залуу уяач  л даа. Цолны хувьд 2008 онд Заамарт айрагдсныхаа дараа авсан.
-Бүсийн наадамд шандас сорино биз?
-Бодсон юм байгаа. Хязаалан, соёолон маань сайн байна. Хүрэн морио бас хурдлуулна даа.

Ø.Áàäìàà