Аймгийн Алдарт уяач Ж.Баярбаатар: Хүрэн морио хулангийн тоосонд хутгаад авъя гэж бодсон

-Төрийнхөө их баяр наадамд их нас айрагдууллаа. Хичнээн насны морьтой ирсэн бэ?
-Эрдэнэт хотоос төрийнхөө их баяр наадмыг зорьж ирээд амжилттай сайхан уралдаж, хүрэн морь маань айрагдсан. Ганцхан энэ их настайгаа л ирсэн болохоор үнэхээр баяртай байгаа. Их сайхан давхилаа. Уг нь зургаан насны морь уясан байсан л даа. Тэгээд хамгийн их найдлага тавьж байсан морио авчирсан маань энэ шүү дээ. Үлдсэн хэд маань бас айраг түрүү авсан сурагтай байна.  Анх удаагаа л их довонд уралдаж байна. Өмнө нь Дүнжингаравт бол ирж байсан л даа. Ямар ч байсан энэ жил морио хулангын тоосонд хутгаад авъя гэж бодож ирсэн.
-Хүрэн мориныхоо айрагдана гэсэн багцааг ямар ямар наадмуудаас олж харсан бэ?
-Энэ хүрэн маань нилээн хурдан л даа. Энэ жил уяа сойлго нь ч яг сайхан таарсан юм. Хавар тэр хавьдаа гурав түрүүлсэн. Уяач хүн өглөө бүр морио сонжиж хардаг. Уяа сойлго нь таарсан эсэх нь ерөнхийдөө нүднээсээ харагддаг л даа.
-Хүрэн морь чинь бага насандаа хэрхэн уралдаж байсан бол?
-Даага шүдлэндээ их сайн давхиж байсан гэдэг юм билээ. Би Сэлэнгэ аймгийн Бургастай сумын Жаргалсайхан гэдэг хүнээс хязаалан үрээ байхад нь авч байсан юм. Одоо долоон настай.
-Таны хувьд морины тоосонд ороод хэр удаж байна вэ? Аймгийн Алдарт цолоо хэдэн онд авсан бэ?
-Ах нь морь уяад гучин жилийг ардаа үджээ. Би Булган аймгийн Орхон сумын уугуул хүн л дээ. 2004 онд нутаг усныхаа нэрийг гаргаад аймгийн Алдарт цолоо авсан юм. Цолонд хүргэсэн сайхан сайхан хурдууд байлаа. Энэ хүрэн над дээр ирээд олон наадамд урамтай сайхан хурдалсан юм шүү дээ.
-Бүсийн наадамд уралдах уу?
-За даа. Морио харж байгаад л шийднэ дээ. Саяхнаас нутгаар сайхан зун гарч, өвс ногооны шим ч гайгүй байна. Ер нь бодож байгаад болноо. 

Ш.Бадмаа