Өмнийн говийн “Алтан хараацайнууд”

ММСУХ-ны  “Удирдах ажилтны II зөвлөгөөн” 5 сарын 11-нд  Улаанбаатар зочид буудалд болсон талаар бид өмнө нь мэдээлж байсан билээ. Тэрхүү зөвлөгөөнд Ховд аймгаас бусад бүх аймгийн уяачдын холбооны төлөөлөл хүрэлцэн ирсэн билээ. Тэр дундаа цангинасан, цайлган инээд хөөрөөр дүүрэн унаач хүүхдүүд хамтдаа кино үзэж, дайллага цайллаганд орж сэтгүүлч бидэнтэй хэвлүүхэн ярилцаж, зарим нь зөвлөгөөн дээр санал бодлоо ММСУХ-ныхонд хэлж байсан юм. Нутаг нутгаас 70-аад хүүхэд ирсэн бөгөөд тэдэнтэй цөөн хормыг хөөрөлдсөнөө та бүхэнд ээлж ээлжээр нь хүргэж байна.

- О.Чаминчулуун. “Би Өмнөговь аймгийн Урантэс сумын 9Г ангид сурдаг. Морь унаад зургаан  жил болж байна. Долоон настайгаасаа морь унасан болохоор надад морь унахад ямар ч асуудал гардаггүй. Одоо Н.Мэндбаяр ахын морийг унадаг. Азарга, даага гээд бүх насны морь унана. Н.Мэндбаяр ахын халтар даагыг унаж өөрийн болон зэргэлдээ сумдын наадмуудад долоон удаа түрүүлсэн дээ. Би 2011 онд сумынхаа шилдэг унаач болсон. Цаашдаа олон олон амжилт гаргана гэж өөртөө итгэдэг”.
-Батмөнхийн Өлзийхутаг. “Өмнөговь аймгийн Ханхонгор сумын 9-р ангид сурдаг. Би 10 жил морь унасан. Буянтогтох ахын бүх морьдыг унадаг юм. Олон уралдаанд амжилт үзүүлж , 2011 онд сумын шилдэг унаач болсондоо баяртай байдаг. Цаашдаа амжилтаа бататгахын тулд хичээх болноо. Хотод ирж олон гоё газраар явж, олон хүүхдүүдтэй танилцаж, найзууд болсондоо баяртай байгаа. Кино үзсэн маань их гоё санагдлаа”.
-Түмэнжаргалын Адъяасүрэн. “Би 13-н настай. Долоон жил морь унаж байна даа. Олон наадамд оролцож байсан. Мөнхтайван ахын хээр үрээгээр Говьшанхад түрүүлсэн наадам хамгийн дурсамжтай байдаг. Өнөөдрийн  сэтгэгдэл гоё байна. Ер нь морь унах маш гоё. Хурдан давхихад ёстой сайхан. Уралдаж явахдаа мориноосоо ойчдог  ч унаад сурчихсан учраас өвддөггүй ээ” .
-Э. Гантулга. “Номгон сумын 3-р ангид сурдаг. Хамгийн анх 5 настайдаа морь унаж сурсан. Одоо 10 настай. Надаас гадна миний дүү Ганбат морь унадаг. Тэр 7 настай. Би  Нарангэрэл ахын морийг унаад сумандаа 3 түрүү авсан. Энд ирсэн гоё байна. Маш олон найзтай боллоо. Баяртай байна”.
-Баатарын Мөнх-Очир. “Энэ жил 12 настай, Цогтцэцэн сумын 5-р ангид сурдаг. Би  7  жил морь унаж байна. Анх манай ах морь унуулах санал тавиад би зөвшөөрөөд унаж эхэлсэн. Тэгэхэд би 5 настай жоохон байсан. Анх морь унахад дөрөө мултрах гээд хэцүү байсан ч би моринд дуртай болохоороо амархан сурчихсан  юм. Одоо би Амгалан ахын морийг унаж байгаа. Өмнө нь Мөнхбат ахын морийг унадаг байлаа. Ханбогдын наадамд азарганы түрүүг авч, Говьшанхад аман хүзүүдсэн амжилтууд бий.  Говьшанхад хээр даагатай аман хүзүүдэхэд үнэхээр сайхан байсан даа. Би  2011 онд сумын шилдэг унаач болсондоо их баярладаг юм. Намайг энэ хүртэл явуулсан Амгаа ахдаа баярлалаа гэж хэлье дээ”.
-Цогтгэрэлийн Төрмандах. “Би наймтайгаасааа морь унасан. Одоо 12 настай. Баяндалай сумын 5-р ангид сурдаг. Би Бууяа ахын морийг унаад аймагт нэг түрүү, 3 айраг авсан даа. Хонгор соёолонгоор сайн уралдсан. Цаашдаа Бууяа ахынхаа морийг унасаар байна даа. Аав ээждээ хайртай шүү. Бууяа ахдаа баярлалаа гэж хэлмээр байна”.