Морин уралдааны гайхамшгийн хэмжүүр Ман О Вар

Монголчууд бид эртнээс хүлэг сайн морио эрхэмлэн дээдэлж, насан эцэслэснийх нь дараа ч толгой, сүүл гэх мэтийг нандигнан хадгалсаар ирсэн. Сайн хүлгийнхээ   дурсгалыг хүндэтгэх  энэ мэт зан үйл гадны орнуудад ч цөөнгүй байдаг аж. Энэ удаа та бүхэндээ дэлхийн морин спортын түүхэнд амьд домог хэмээн яригддаг Ман О Варын талаар хүргэж байна.
 Одоогоос 50 гаруй жилийн өмнө морин уралдаанууд өнөөдрийнх шиг нэр хүндтэй, хүчирхэг байсангүй. Гэсэн хэдий ч тухайн үеийн хурдан морь сонирхогчдын дунд Ман О Варын талаар сонсоогүй хүн бараг байсангүй. Учир нь тэрээр морин уралдаан дахь гайхамшгийн хэмжүүр нь болж байсан юм. 21 удаа гараанд гарч 20-д түрүүлж, /нэгд нь  2-р байранд орж/ тухайн үедээ Америкийн хамгийн өндөр мөнгөн шагнал хүртсэн мориор тодорч байсан. Тэрээр нийт 8 удаа рекорд тогтоож байснаас 3 удаа дэлхийн рекорд, 2 удаа Америкийн рекорд, 3 удаа хэдхэн секундын замын рекорд тогтоож байсан билээ. Ерөнхийдөө Ман О Вар амьдралынхаа туршид ямагт нэгдүгээрт бичигдэж ирсэн бөгөөд олон гайхалтай унагатай болсоны нэг нь ВарАдмирал тэмцээний гурван удаагийн аварга болсон юм. Гэхдээ хурдан морь судлаачид түүний үржил селекцийн тал дээр эзнийг нь буруутгадаг бөгөөд хэрвээ энэ тал дээр илүүтэй анхаарсан бол түүний үр төлүүд нь эцгийнхээ шийрийг хатаах байсан хэмээдэг. 30 насалж зүрх нь хаагдсаны улмаас насан эцэслэсэн энэ гайхалтай хүлгийг занданшуулан уралдааных нь өнгүүдээр тусгайлан будсан авсанд хийж оршуулжээ. Энэ бол түүхэнд анх удаа морийг ингэж оршуулсан явдал билээ. Түүний оршуулганд 2000 хүн ирсэн бөгөөд  сүүлийн удаа харах гэж эгнэн зогсож олон мянган шүтэн бишрэгчид нь харамсаж байлаа. Өдгөө түүний булшин дээр нь алдарт Ман Оварийн хөшөө бий. Энэхүү хөшөө нь Кентаккийн морины паркад байдаг.