Адуун хийморьтой аялгуун эзэд

Адуун хийморьтой аялгуу сацруулж, түмний  хүндлэлийг хүлээсэн дуучид уран бүтээлчдийн ихэнх нь  морь уях төрийн хэрэгт шамдагсад байдаг.  Ардын дуу мэт аялагдах “Манай адуу”-ны эзэн СТА дуучин А.Мөнхбат гэхэд унаж явсан машинаа мориноос өгчихсөн “хорхойтон”. Самсаа шархируулах “Гүйгүүл морь”-ны эзэн СТА дуучин А.Хосбаяр  удам дагасан уяач. Аавын шийрийг хатааж хурдан хүлгэдийн хийморьт сүсэглэсэн дуучин залууг адууны дүйтэй хэмээдэг юм билээ.  “Алсаас чамдаа”-г аяланхан явдаг СТА дуучин  Д.Намсрайноров мөн л уяач.  Ухаант мэргэн уяачдын голомт болсон Төв аймгийн унаган хүү хурдан моринд шимтэхгүй гээд ч яалтай билээ. “Эр бор харцага”-ыг амилуулагч “Түмэн-Эх”чуулгын дуучин Д.Жавхаасайхан мөн л монгол ахуйд ойрхон нэгэн. Од тоолон адуу манах эр хүний жаргал хэмээн үздэг тэрээр мөн л хурдан моринд шимтэгсдийн нэг.
А.Тэлмэн