М.Мөнхмагнай: Монгол уяач

Уураг сунгаж зоог нь илээд
Уяа тойрон омогшиж алхана
Хууч хөөрөн айраг залгихад
Хүслийн далайд морьд янцгаана
Хөхөл боож, сүүл шуусан
Хусуур зүүж, хөөрөг зөрүүлсэн
Сүүн цацалтай Монгол эрсийн
Сүлд  хийморь цалгиж байдаг
Сүслэн мөргөдөг төрийн наадамдаа
Сүргийн манлай азаргаа мордуулаад
Сан тавьж, сэтгэлээ ариусгаад
Самсай шархируулж, морьдоо хүлээнэ 
Хөхөл боож, сүүл шуусан
Хусуур зүүж, хөөрөг зөрүүлсэн
Сүүн цацалтай Монгол  эрсийн
Сүлд  хийморь  цалгиж байдаг
Угшил сайтай хүлэг морьд нь
Уралдах  наадамдаа сүр  нэмнэ
Алтан тууртныхаа  буяныг даасан
Аавын хүүгийн алдар цуурайтана
 Хөхөл боож, сүүл шуусан
Хусуур зүүж, хөөрөг зөрүүлсэн
Сүүн цацалтай Монгол эрсийн
Сүлд  хийморь  цалгиж байдаг

 Хотгойд овогт Мандаагийн Мөнхмагнай                  
                                                            Орхон аймаг. 2011,02,01