“Сэргэлэн хурд 2012”-ын эргэн тойронд

Жил бүр уламжлал болон зохион явагддаг "Сэргэлэн хурд 2012" уралдаан Төв аймгийн Сэргэлэн суманд энэ сарын 7-нд болж өндөрлөлөө. Тус сумын засаг даргын тамгын газар, “Сэргэлэн хурд” морин спорт уяачдын холбооноос хамтран зохион явуулсан энэ удаагийн уралдаанд их нас, соёолон, хязаалан насны газар газрын хурдан хүлгэд шандасаа сорьсон юм. Уралдааны үеэр хэд хэдэн уяачид "Сумын алдарт уяач" цолоо гардан авсан. Түүнчлэн сум орон нутгийнхаа хурдан морины хөгжилд хувь нэмрээ оруулж яваа ААУяач Сүхбаатар, Э.Энхбаяр, О.Батбилэг, Т.Ихбаяр, Л.Сүрэнжав нарын уяачдад Сэргэлэн сумын засаг дарга Ц.Мэндсайхан "Хийморь морь" шагналыг гардуулан, Хөх хотын аяллын урилгаар бэлэг барьсан юм.   
Азарга, соёолонд 33 морь гараанаас гарснаас Төв аймгийн Сэргэлэн сумын харьяат, МУТМУяач Ц.Хэнмэдэхийн зээрд халзан түрүүлж хурсан олны баярлуулав. Удаах байранд  Төв аймгийн Сэргэлэн сумын уугуул, "Босоо хийморь" галын уяач Б.Шагдаржавын буурал соёолон, Ховд аймгийн Чандмань сумын уяач Б.Ерөөлтийн халтар айрагдсан юм. Гурваар хурдалсан халтар үрээний уяа сойлгыг нийслэлийн Алдарт уяач Ц.Цэнд-Аюуш тааруулжээ. Харин айргийн дөрөвт Өвөрхангай аймгийн уугуул, "Заабар" ХХК-ийн уяач Батбаярын халтар, Төв аймгийн Сэргэлэн сумын уяач Ц.Мэндсайханы хонгор халзан азарга айргийн таваар оржээ. “Сэргэлэн хурд 2012” уралдааны түрүү морьдыг 500 мянган төгрөгөөр байлсан юм.
Харин их насанд 64 морьд уралдсанаас Ховд аймгийн Мөст сумын уугуул, "Босоо хүлэг" галын МУАУяач Б.Буяннэмэхийн хээр халзан магнайлав.  Говь-Алтай аймгийн Дарви сумын уугуул, Д.Дүйнхоржавын суман хүрэн, Ховд аймгийн Мөст сумын уугуул, "Босоо хүлэг" галын МУАУяач Б.Буяннэмэхийн бор, Ховд аймгийн уугуул, "Ану сервис" ХХК-ийн уяач Инжинашийн халтар, Булган аймгийн Могод сумын уугуул, "Морин эрдэнэ" галын уяач Н.Базаргарьдын хүрэн халзан тус тус айргийн таваар оров. Ийнхүү их насанд “Босоо хүлэг”-ийн Буяннэмэх алдарт одтой сайхан наадлаа.
“Сэргэлэн хурд 2012”-т 42 хязаалан уралдсан. Үүнээс "Босоо хийморь" галын уяач Б.Дашдоржийн уяа сойлгыг нь тааруулсан, аймгийн Алдарт уяач С.Сосорбарамын зээрд халзан түрүүллээ. С.Сосорбарам алдарт нь Өвөрхангай аймгийн Арвайхээр сумын уугуул нэгэн. Харин хоёрт Отгонбаатарын хонгор, гуравт Төв аймгийн Бая?жаргалан сумын уугуул "Агт эрдэнэ" галын уяач Б.Дашбаатарын хул удаалав. Төв аймгийн Сэргэлэн сумын алдарт уяач О.Батбилэгийн саарал, мөн аймгийн ААУяач О.Батбилэгийн уясан Өлзий-Оршихын халтар айргийн тавд багтлаа.