Хурдан морь унаач З.Жаргалсайхан: Хамгаалалтын малгайтай болохоор санаа зовох юмгүй уралдсан

Дорнодын МСУХ байгуулагдсаны 15 жилийн ойн нэрэмжит дээд гурван насны уралдааны айргийн дөрөвт хурдалсан азарганы унаач хүү манай энэ удаагийн бяцхан зочин. Найман настайгаа эхлэн морь унаж байгаа З.Жаргалсайхан өдгөө дөрөв дэх жилдээ уралдаж байна. Хэдийгээр мориноос унах, тоос шороо нүд рүү орох гэхчилэн бэрхшээл олон гардаг ч салхи татуулан давхиж явах сайхан байдаг юм хэмээн тэрээр ярина. Бид түүнийг Дорнодын уяачдын холбооны 15 жилийн ойн уралдаанд унасан морио айрагдуулаад байхад нь таарч  бяцхан яриа өрнүүлсэн юм.
-За унасан хүлэг хурдан байв уу? Бяцхан унаач өөрийгөө танилцуулаач?
- Намайг  З.Жаргалсайхан гэдэг. 12 настай. Би Цагаан-Овоо суманд 5-р ангид сурдаг. Сая Баттулгын хул азаргыг унаад айргийн дөрөвт хурдаллаа. Би энэ хүний морийг Цагаан-Овоо сумын  мартын наймны уралдаанд унаад бас түрүүлж байсан. Би уг нь аймгийн Алдарт уяач Бадамхүү гэдэг хүний морь унадаг.
-Хэдэн жил морь унаж байна?
-Найман настайгаасаа эхэлж унасан. Одоо 4 жил болж байна.
-Морь унахад ямар бэрхшээлтэй зүйл гардаг вэ?
-Хүйтэнд унахаар даардаг, зун болохоор нүдрүү шороо ордог. Мориноосоо унах тохиолдол ч гардаг ч морь унах гоё байдаг юмаа.
-Танайд чамаас өөр морь унадаг хүн байгаа юу?
-Манай ах бас морь унадаг. Ах болон уяач маань надад их зүйлийг хэлж заадаг.
-Морь унаад амжилт гаргахад юугаар шагнадаг вэ?
-Янз янз бүр. Хичээлийн хэрэгсэл, хувцас, мөнгө гээд  л.
-Саяны уралдаан чиний хувьд юугаараа онцлог байсан бэ?
-Айргийн дөрөвт орсондоо баяртай байгаа. Бас хамгийн гоё санагдсан нь бидэнд хамгаалалтын малгай өмсүүлсэн. Урьд нь ерөөсөө ийм малгай өмсүүлж байгаагүй л дээ. Заримдаа мориноосоо унах үе гардаг. Малгайтай болохоор гэмтэл бага гарна гэж ах нар хэлж байна лээ. Тийм болохоор санаа зоволтгүй уралдаж чадсан шүү.
-Баярлалаа.
                                                                                                                                                Ш.Бадмаа