Аймгийн Алдарт уяач Т.Болд: Аавыгаа баярлуулаад үнсүүлэх сайхан л байдаг юм билээ

-Төрийнхөө их баяр наадамд шүдлэн айрагдуулсан танд нийт уншигчдынхаа өмнөөс баяр хүргэе. Баярынхаа сэтгэгдлээсээ хуваалцахгүй юу?
-Баярлалаа. Юун түрүүнд баяр наадмын зохион байгуулалт сайн байсныг хэлэх нь зүйтэй байх. Өнгөрсөн хавар Дүнжингаравын хурд бүсийн уралдаанд ирж оролцсон. Харин энэ удаа эрлийз адууг уралдуулахгүй гэдэг шийдвэрийг сонсоод шүдлэн, соёолон насны морьтой улсын наадмыг зорьж  ирсэн. Тэр холоос зорьж ирсний хэрэг гарч, шүдлэн маань айрагдлаа.
-Соёолон хэдээр давхисан бэ?
- 26-гаар давхисан. 
-Шарга шүдлэнгийнхээ угшил гарвалын талаар дэлгэрүүлбэл?
-Хэнтий аймгийн Баянхутаг сумын уугуул Нацагдоржийн Батдорж гэдэг хүний унаган адуу.Ононмөр угшилтай адуу юм билээ. Найз маань намайг олон жил моринд сэтгэл зүрхээ зориулж яваа гээд дааганд нь бэлэглэсэн юм. Над дээр ирээд Өвөрхангай аймгийн Төгрөг сумын наадамд түрүүлж, Тарагт сумын наадамд гуравлан, аймгийн наадамд аравт давхисан.
-Сайн санааны үзүүрт тос гэдэгчлэн сэтгэлээсээ өгсөн адуу айрагдаж түрүүлэх нь элбэг байдаг. Хурдан буян хайрласан найздаа талархлаа илэрхийлсэн үү?
- Тэгэлгүй яахав. Үрээ маань айрагдангуут л утсаар ярьж “миний найзын адуу үнэхээр хийморьтой хурдан юмаа” гэж хэлсэн.
-Шарга үрээний энэ жилийн анхны уралдаан уу?
-Дан уяагаар улсын наадамд ирж уралдаад аман хүзүүнд хурдаллаа.
-Саяхан Өвөрхангай аймгийн 80 жилийн ой болсон. Т.Болд уяач аймгийнхаа наадамд хэрхэн наадсан бэ?
-Шарга үрээ маань ханиадтай байсан учраас давхиулаагүй ээ. Уг нь Хүй долоон худагт ханиад гарсан гэж дуулаад наадам тулгаж 7-р сарын 8-нд очсон ч нэмэр болоогүй ээ. Агаар дуслын замаар учраас халдчихдаг юм байна. Эргээд ирэхэд манай аймгийн адуу ч гэсэн  нэлэнхүйдээ ханиад хүрсэн байсан. Гэхдээ аймгийнхаа ой болж байхад яаж зүгээр байхав гээд арай гайгүй гэснээсээ шилж аз?рга, даага, соёолон мордуулсан. Азарга 10, даага-25, соёолон  дөч гаргаж  давхилаа.
-Аймгийнхаа ойгоор Алдарт уяач цол хүртсэн дуулдсан. Хэдийнээс хурдан моринд дурлах болсон юм бэ?
-2001 оноос хойш морь уяж байна. Миний аав моринд дуртай уяач хүн бий. Аймаг сумынхаа наадмаас олон айраг түрүү хүртэж байсан аймгийн Алдарт уяач хүн. Алтны дэргэдэх гууль шарлана гэдэг шиг моринд элэгтэй аавын маань нөлөө их байсан байх, намайг уяач болоход.
-Эцгийн мөрөөдлийг биелүүлэн  төрийн наадамд морь айрагдуулсан хүүдээ хэрхэн баяр хүргэсэн бол?
-Мэдээж маш их баяртай байсан. Шүдлэнгийн уралдааныг зурагтаар үзчихээд морь барианд орсоны дараа утсаар ярьж баяр хүргэсэн. Тэгээд морь цоллохоос өмнө хотод ирж, надтай хамт цэнгэлдэхэд орсон доо. Хүүгээрээ бахархаж байна гээд баяр хүргэж үнссэн. Аавыгаа баярлуулаад үнсүүлэх сайхан л байдаг юм билээ.
-Алдартын нэртэй өөр ямар хурдан хүлгэд байдаг вэ?
- Аймгийн Алдарт уяач цол хүртэхэд  Хэнтий аймгийн Мөрөн сумын уугуул Энхчулуун гэдэг хүний унаган адуу халзан азарга  маань ихээхэн үүрэг гүйцэтгэсэн. Өвөрхангай аймгийн наадамд дөрөв айрагдсан хурдан буян байгаа юм.
-Хамгийн их сэтгэлд үлдсэн наадмынхаа дурсамжаас хуваалцаач?
-Аймгийнхаа наадамд шүдлэн түрүүлгэж байсан 2002 оны наадам юмуу даа. Хэнтийн Дадал сумын уугуул хурдан алаг азарганы эзэн  Дарамренчин гуайн унаган адуу хул шүдлэнгээ аймгийнхаа наадамд түрүүлэхэд үнэхээр их баярлаж билээ.
-Адууны наймаа хэр хийж байна?
-Бусдын жишгээр Сүхбаатар, Дорноговиос нэлээд адуу авсан. Сүүлийн жилүүдэд өөрийн унаган адуугаараа л голдуу наадаж байна даа.
-Ярилцсанд баярлалаа. Уясан хүлэг тань хурдан байж тод магнай, торгон жолоогоо өргүүлж яваарай.
"Тод магнай"сэтгүүл дугаар 19