“Удамт хүлэг” галын уяач И.Атарбаян: Залуу байхад айраг түрүү л бодогдоод адуугаа хайрладаггүй юм байна лээ

-Ихэнх уяачид маань удам дагасан хүмүүс байдаг. Таны хувьд тэрхүү уламжлалыг дагаж уяач болсон уу?
-Үгүй ээ, манай аав аймгийн аварга малчин Бадарч гэж хүн байсан. Аавын уядаг хоёр хул морины нэг нь Баян-Уул сумын наадамд нэг түрүүлж, гурав айрагдсан. Соёолон хүртлээ уралдаад дахиж уралдуулаагүй юм гэнэ лээ. Сүүлд бас нэг халтар морь байсан нь даагандаа гуравлаад, шүдлэндээ айрагдаад, соёолондоо Шарга суманд айрагдсан.
-Шинийн гуравны уралдаанд аман хүзүүдсэн хүрэн халзан морь таны унаган адуу юу?
- Тийм миний унаган адуу. 2004 онд даагандаа сумын наадамд зургаалаад, хоёр наадамд тавласан. Тэгээд нэг хэсэг бэртэл аваад уралдаагүй. Залуу байхад  мэддэггүй юм байна л даа. Өнгөрсөн жил Шарга сумын наадамд аман хүзүүдээд, өчигдрийн /2-р сарын 24-ний/ уралдаанд аман хүзүүдэж байгаа юм. Хүн залуу байхад айраг түрүү л бодогдоод адуугаа хайрладаггүй юм байна лээ. Нас жаахан ахиад ирэхээр нэг наадмаар хязгаарлахаа больчихдог юм байна. Болохооргүй санагдвал дараагийн наадам байгаа гээд татчих жишээний.
-Өнөөдрийг хүртэл  хичнээн айраг түрүү хүртсэн байх юм?
- Одоогоор морь түрүүлгэж үзээгүй, дөрвөн айраг л аваад байна. Нас залуу, наадам олон байна. Нэг өдөр түрүү авах байлгүй дээ.
- Тийм өдөр ойрхон байгаа байхаа. Танд баярлалаа.