Өвс, хадлангийн явц 54,2 хувьтай байна

Хүйтний ам наашилж, хөхүүрийн ам цаашилж буй энэ цаг үед өвлийг өнөтэй давах бэлтгэл ажлууд хийгдсээр байна. 2022 онд малчдын түвшинд 1.2 сая тонн өвс, харин бусад тэжээлийн тухайд 276,6 мянган тонныг бэлтгэхээр төлөвлөжээ. Тодруулбал сүрэл 1.8, ногоон тэжээл 18.6, үйлдвэрийн тэжээл 73.1, гар тэжээл 82.6, дарш 1.1, давс, хужир, шүү 99.4 мянган тонныг бэлтгэхээр төлөвлөсөн байна. Гэсэн ч  хадлангийн бүс нутгаар бороо хур элбэг байгаагийн улмаас өвс тэжээлийн бэлтгэл ажил удааширч өнөөдрийн байдлаар малчдын түвшинд хадлангийн явц 54.2 хувьтай байна.

Үүнээс гадна аймаг, нийслэл, сум, дүүргийн өвс, тэжээлийн аюулгүйн нөөцийн хангамжийг бүрдүүлэх ажлын хүрээнд өвс 25.3, тэжээл 12.5 мянган тонныг тус тус бэлтгэх чиглэлийг өгсөн бөгөөд одоогийн байдлаар өвс 8.4, тэжээл 2.5 мянган тонныг бэлтгэжээ. Энэ нь орон нутгийн тэжээлийн нөөцийн хангамжийг бүрдүүлэх ажил 26.5 хувьтай явааг илэрхийлж буй юм.

Дашрамд сонирхуулахад малын тэжээл үйлдвэрлэл нь тухайн жилийн зуншлага, байгаль цаг уурын нөхцөлөөс шалтгаалж харилцан адилгүй байдаг ч сүүлийн жилүүдэд ногоон тэжээлийн үйлдвэрлэл эрчимтэй өсөж байгааг албаныхан хэллээ. Мөн малын тэжээлийн дотоодын нөөц, тухайн жилийн өвлийн цаг агаарын төлөв, намрын малын тарга хүчинд үндэслэн экспорт, импортын зохицуулалтыг хийдэг аж.