"Титэм" халзан азарганы амжилтыг хэвээр үлдээжээ

Гурван жил тутмын “Их хурд” уралдааны 9 дэх удаагийнх өнөө жил тохиож буй. Өнгөрсөн амралтын өдрүүдэд Хэнтий аймагт болсон “Их хурд-9” уралдааны азарганы уралдаан нэлээд дуулиан дэгдээж, зохион байгуулах комисс хэд дахин хуралдсаны эцэст шийдвэрээ гаргаж түрүү магнайд хурдалсан Өвөрхангай аймгийн Хужирт сумын уугуул, “АПУ” ХХК-ийн Ерөнхийлөгч Пүрэвийн Батсайханы Титм халзан, айргийн тавд хурдалсан Завхан аймгийн Алдархаан сумын уугуул, Чинбатын Болор-Эрдэнийн халтар азарганы амжилтыг хэвээр тооцохоор болсон. Ингэснээр:

Түрүү магнайд Тод манлай уяач О.Батбилэгийн уяа сойлгыг нь тааруулдаг Өвөрхангай аймгийн Хужирт сумын уугуул Пүрэвийн Батсайханы Титэм халзан, аман хүзүүнд Тод манлай уяач Т.Ихбаярын уяа сойлгыг нь тааруулдаг Төв аймгийн Баян сумын уугуул, МУ-ын Манлай уяач Баасансүрэнгийн Нямжавын Богд хээр, айргийн гуравт МУ-ын Манлай уяач Сашкагийн Эрдэнэбатын уяа сойлгыг нь тааруулдаг Булган аймгийн Гурванбулаг сумын уугуул, Тод манлай уяач Дамбын Хишигжаргалын Цолмон халзан, айргийн дөрөвт Булган аймгийн Хутаг-Өндөр сумын харьяат, аймгийн Алдарт уяач Ө.Ганбатын хээр, айргийн тавд  

аймгийн Алдарт уяач Г.Болдбаатарын уяа сойлгыг нь тааруулдаг Завхан аймгийн Алдархаан сумын уугуул, Чинбатын Болор-Эрдэнийн халтар  азарга тус тус хурдалж, цоллууллаа.

А.Тэлмэн