Б.Ганпүрэвийн нууц авъяас

Монгол наадам, морин уралдааныг омогштол огштол, зураглан тайлбарлаж үзэгч олноо өндөлзүүлдэг залуусын нэг нь Баатарын Ганпүрэв. Өдгөө өөрийн гарын шавь бэлтгэн залуу үедээ үлгэрлэж буй тэрээр дууны шүлэг бичдэгийг уншигч та мэдэх үү. Нэрт тайлбарлагчийн бичсэн

Омголон догшин зантай

Онцгой содон галбиртай

Одтой наадмын түмэн эх

Онгод бадраах хийморийн гал

                Манлай уяачийн мөнхийн омогшил

                Монгол наадмын амьд домог

                Молор эрдэнэ, шүтээн хүлэг ээ... хэмээн хөврөх шүлэг дуу болон амилж, “Түмний эх” студийн ураан бүтээлчид дүрсжүүлэн говийн нэрт Ж.Содномпил Манлайг хурдан хүлгийнх нь хамтаар мөнхөлсөн.

Түүний дараагийн уран бүтээл Говь-Алтай аймгийн Жаргалан сумын уугуул, Монгол Улсын Манлай уяач Анандын Ариунсайханы Хөөрхөн зээрдэд зориулагдсан бөгөөд эзэн уяачийн хүсэлтээр эвлүүлэн шүлэглэжээ. Харин түүнийг нь Харангын Лхагваа бага зэрэг өөрчлөн нийтэд хүргэсэн билээ. Морьтны соёлыг түгээн дэлгэрүүлэхэд түчээлж буй Б. Ганпүрэвтээ уран бүтээлийн ургац арвин байхыг хүсэн ерөөе.

Б.Хастөр