Сумын Алдарт уяач Ш.Баасанбат:Төрийн наадамд торгон жолоо өргүүлж, өвөөгийнхөө нэрийг дахин дуурсгах зорилго тээж явна

Төв аймгийн Баянжаргалан сумын харьяат Ш.Баасанбатын ярилцлагыг хүргэж байна.

-Хэзээнээс морь уяж байгаа вэ? 
-Арван хэдэн настайгаасаа буюу хурдан моринд хүндэдсэн цагаасаа л. Би зургаан настайгаасаа эхлээд аавынхаа уясан морьдыг унаж уралдсан. Олон ч айраг, түрүү авч байлаа. Ер нь айраг, түрүүнээс мултардаггүй хүүхэд явлаа. 
-Өөрийн нэр дээр морьд уяад, хамгийн анх ямар амжилт гаргаж байв?
-Цэргээс халагдаж ирээд өөрийнхөө нэр дээр морьд уралдуулж эхэлсэн. 2001-2002 оны үед байх аа, сумын баяр наадмаас хоёр айраг хүртэж байлаа. Тэгээд 2014 онд есөн түрүү, 20-н хэдэн айргийн амжилтаар сумын Алдарт уяач болсон. Анзаараад байхад их насны морьдын амжилт арай илүү байдаг юм билээ. 
-Ах тань Өлзийт хороололд очиж гурван жил шинэ цагийн уяанд суралцсан гэсэн. Таны хувьд...?
-Даваахүү, талийгаач Ааяа /Аюуш агсан/, Онон нарын Тод манлай уяачдаас мэдэхгүй чадахгүйгээ асууж сурагладаг байсаан. Тэрний хүчээр Баянжаргалан сумын 90 жилийн ойгоор манайхан гурван түрүү авлаа шүү дээ. Миний хувьд энэ наадамд их насны морио түрүүлгэсэн. 
-Дүү нартайгаа хэр зөвлөлддөг вэ. Ахын хувьд зааж зөвлөж, чиглүүлдэг л биз дээ?
-Гурвуулаа багаасаа хурдан морьтой ойр өссөн болохоор нэг нэгэндээ зааж сургамжлаад байх нь бага. Хоорондоо зөвлөлдөж байгаад уядаг даа.
-Айраг, түрүү хүртэх бүрт л аавын тань магнай тэнийж байгаа нь лавтай. Таны хувьд хэзээ, хаанахын наадмаар аавыгаа хамгийн ихээр баярлуулсан гэж боддог вэ?
-Чойрт азарга, их насны морь айрагдуулж байлаа. Мөн Хэнтий аймгийн Дархан суманд болсон хаврын бүсийн уралдаанд морь айрагдуулсан. Миний хувьд аймаг, сумдын ойн наадамд л голдуу явдаг. Хааяа нэг улсын баяр наадамд оролцоно. Тэр болгонд аав минь таатай л байдаг юм. 
-Төрийн наадамд торгон жолоо өргүүлж, таван үеэрээ морь айрагдуулсан бахдалт түүхийн эзэн болох нууцхан хүсэл бий биз?
-Тэр мэдээж. Галын хүү, Галын ач гэж улсад цоллуулах зорилго тээж л явна. Энэ зорилгодоо хүрэхийн төлөө бид их хичээж байгаа.
-Цаг гарган ярилцсан танд баярлалаа. Уясан хүлэг болгон тань хурдан байх болтугай.
-Төв аймгийн Баянжаргалан, Нялга сумынхандаа болон Монголынхоо нийт уяачдад морьд нь хурдан байж, одтой сайхан наадаж явахын ерөөл дэвшүүлье.

Тод магнай сэтгүүлийн Төв аймгийн тусгай дугаар 2018 он