Нийслэлийн Алдарт уяач Н.Батболд: Зээрд азаргаа хоёр жил дарааллан түрүүлгэсэн

-АХ-ын түүхт 99 жилийн ойн баяр наадамд хар даагаа айрагдуулсан танд баяр хүргэе. Баяр наадмынхаа сэтгэгдлээс хуваалцахгүй юу?

-Баярлалаа. Төрийн наадмаас айраг хүртсэндээ маш их баяртай байна. Хурдан хар даага маань төрийн наадамд аман хүзүүдэж, “Хүй мандал” гал уяаны хамт олныг баярлууллаа. 
-Хар үрээ наадмын өмнөх сунгаануудад хаагуур давхиж байсан бэ?
-Гурван сунгаанд гурвууланд нь өнгөлсөн. Сүүлийн сунгааныг би өөрөө дагаж үзсэн юм. Сунгаануудад  өнгөнд байсан болохоор баяртай мэдээ дуулах болов уу гэсэн хүлээлттэй байсан нь ёсоор боллоо. Сунгаанаас гадна хавар  1000 долларын бооцоот уралдаанд түрүүлсэн болохоор найдлага өндөр байсаан. 
-Сэтгэл зүйн хувьд бэлтгэлтэй байжээ.
-Гэхдээ л төрийн наадам  шүү дээ. Ямар ч наадамд морь айрагдуулна гэдэг хүлэг, эзэн, уяач, унаач дөрвийн аз өм тэгширч байж бүтдэг зүйл. Тэр утгаараа дүүрэн итгэх аргагүй юм. 
-Бүсийн уралдаануудаас хишиг хүртэж байв уу?
-Байсаан. Өнгөрсөн жил Баянхонгор аймагт болсон Ламын гэгээний 380 жилийн ойн бүсийн уралдаанд соёолон айрагдуулсан. Гарсан цагаас өнгөлсөн 134 дугаартай хонгор соёолон миний адуу байгаа юм. Эзнийг нь хэлэхгүй хүүхдийн номероор зарлаад байсан шүү дээ. Бараг 18 км өнгөлөөд, үзүүрийн хоёр километрт унжаад тавласан. Мөн Өмнөговь аймагт болсон “Говь шанхын хурд-6“ говийн бүсийн уралдаанд хээр шүдлэнгээ найзынхаа нэр дээр айрагдуулсан. 

-Том наадмын өм нээгджээ. Өнөө жил хэдэн насны морьтой ирсэн бэ?
-Зургаан насны 14 адуутай ирээд, гурвыг нь л мордуулсан. Хар даага маань айрагдаж, эрлийз дээд ангилалд хонгор соёолон 20 гаргаж, хязаалангийн уралдаанд зээрд үрээ 40 гаргаж давхисан. 
-Ингэхэд хэд дэх жилдээ төрийн наадамд оролцож байгаа юм бэ?
-Сүүлийн арван жил морь мордуулж байна. Үүнээс өмнө даага 14, их морь 40-д давхиулж байсан. Харин орон нутагтаа бол сайхан нааддаг аа. Сүүлийн гурван жил Налайхынхаа баяр наадмаас айраг, түрүү алдсангүй. Нас болгонд айрагдуулж байгаа. Тэр амжилтаараа өнгөрөгч 2019 онд нийслэлийн Алдарт уяач цолыг хүртсэн. 
-Анхны айргаа хэдэн оны ямар наадмаас хүртэж байсан юм бэ?
-1995 онд Хэнтий аймгийн Галшар сумын баяр наадамд зээрд хязаалан таваар давхиулж анхны айргаа хүртэж байлаа. Түүнээс хойш зээрд азарга маань соёолон, хавчигтаа хоёр жил дарааллан Галшард түрүүлсэн. Морь уяхын тухайд бол нэлээд эртний түүхтэй. Би Дорноговь аймгийн Иххэт сумын харьяат, Монгол Улсын Алдарт уяач  Лутмөнхийн Нарангэрэлийн хүү Ононтой олон жил сайхан нөхөрлөж байгаа юм. Манай адууны гол суурь нь тэдний адуу болдог. 

-Яагаад ч юм удамт уяачдын нэг байх гэж бодлоо.
-Миний аав, ээж хоёр Ховд нутгийн улс. Миний хөгшин аав Тавхын бор морьд Ховд аймгийн Алтай  сумандаа сайн давхиж байсан гэдэг юм. Өвөөгийн үйл хэргийг үргэлжлүүлж өдгөө надаас гадна эгчийн хүү морь уядаг. 
-Таамаг зөв байжээ. Ярилцлагаа танд тохиосон хамгийн сайхан наадмын дурсамжаар өндөрлөе. 
-2019 онд би Налайхчуудаа уриалан цэнгэлдэх хүрээлэн барьсан юм. Түүний нээлтэнд зориулж зохион байгуулагдсан уралдаанд миний хонгор азарга түрүүлж, хээр азарга аман хүзүүдээд цоллуулж зогсох хамгийн сайхан байсан. Тэр хээр азарга маань өнгөрсөн жил “Их хурд-8” уралдаанд өнгөнд явж байгаад 20-иодоор давхисан.

-Ийм бахдалт наадам олон тохиох болтугай. Ярилцсанд баярлалаа.

Б.Хастөр