Уралдаанч Б.Одгэрэл: Өнгөлж яваад суусан ч айрагдуулж чадлаа

Тулгар төрийн 2229, Их Монгол Улс байгуулагдсаны 814, Үндэсний эрх чөлөө, тусгаар тогтнолоо сэргээн мандуулсны 109, Ардын хувьсгалын 99 жилийн ой, Үндэсний их баяр наадамд Төв аймгийн Баян сумын харьяат, нийслэлийн Алдарт уяач Д.Пүрэвсамбуугийн хээр хязааланг 475 дугаартай, 13 настай уралдаанч Б.Одгэрэл унаж, айргийн гурваар хурдлуулсан билээ. Долоо дахь жилдээ хурдан морь унаж буй тэрээр мөн л хуучин танил. Өнгөрсөн жил Өвөрхангай аймгийн Баян-Өндөр сумын харьяат Д.Мөнхбатын хүрэн үрээг аман хүзүүдүүлээд байхад нь танилцаж байлаа. 

-Сайхан наадаж байна уу. Сая хэдээр орчихов. 
-Сайхан наадаж байна аа. Та сайхан наадаж байна уу. Сая айргийн гурваар орлоо. Өнгөлж яваад суучихлаа. Гэхдээ яах вэ, айрагт багтаж чадлаа.
-Уулзаагүй нэг жил өнгөрчээ. Сурлага өндөр үү? 
-Өндөр өө. Хангай цогцолбор сургуулийнхаа долдугаар ангийг төгссөн. Одоо наймд орно. 

-Энэ жил хэдэн насны морь унав. 
-Эрлийз дунд, азарганаас бусдыг унаж, дажгүй сайхан л уралдлаа. 
-Наадам маргааш гэхэд юу бодогддог вэ? 
-Би чинь улсынхаа наадамд зургаа дахь жилдээ морь унаж оролцож байна. Улсад морь унах гоё шүү. Тэр тусмаа айраг, түрүүгээр давхиулах илүү сайхан. Ер нь миний дуртай баяруудын нэг бол улсын наадам юм даа. Гэхдээ энэ жилийн тухайд үзэгчгүй наадаж буй жоохон амтгүй мэт санагдаж байна. 
-Та нарын насанд ирээдүйн тухай өдөр бүр л өөр өөрөөр мөрөөддөг байлаа. Чиний уяач болох мөрөөдөл хэвээр үү? 
-Минийх бол өөрчлөгдөөгүй ээ. Уяач болно доо. 

П.Ундраа