МУ-ын Заан Ч.Батзориг: Төрийнхөө наадмаас нэг дор гурван айраг хүртлээ

Сэтгүүлч
Мягмар, 14:36 минут

АХ-ын 99 жилийн ойн баяр наадмын цуврал сурвалжлага үргэлжилж байна.

-Тун чиг сайхан наадлаа. Халуун баяр хүргэе.

-За баярлалаа. Энэ жилийн баяр наадам сайхан болсон. Миний хувьд бор соёолонгоо айргийн тавд, хар азаргаа аман хүзүүнд, шарга морио айргийн дөрөвт хурдлуулан төрийнхөө наадмаас нэг дор гурван айраг хүртлээ. Сэтгэл хангалуун байна.

-Хэдэн насны морьтой ирсэн бэ?

-Хоёр шүдлэн, хоёр соёолон, нэг их насны морьтой ирсэн ч шүдлэнгүүдээ мордуулж чадаагүй. Шарга морь маань 25 хувийн цустай адуу. Өнгөрсөн жил зүүн бүсийн уралдаанд монгол ангилалд уралдсан. Харин өнөө жил улсын наадмаар сэрвээний өндрөөр тэнцсэн ч үүлдэрлэг байдлаар тэнцсэнгүй  хэмээн мордуулаагүй байна лээ. Тэгээд өөр наадам байхгүй тул эрлийз дээд насанд мордуулсан. 50 буюу түүнээс дээш хувийн цустай адуунуудтай уралдаад айрагдаж байна лээ. Тэгэхээр зөв уяатай, сайн монгол адуу бол айхгүй уралдчихаар юм шиг санагдсан шүү. Миний шарга морь сунгаанууд дээр их аятайхан байсан л даа. 7-ны сунгаанд арынхаа морьдоос 500 метрийн зайтай байсан шүү.


-Бор соёолонгийн уяа сойлгын тухайд...

-Шүдлэндээ улсад түрүүлсэн адуу шүү дээ. Өнгөрсөн жил улсад наймлаад давхар уяагаар зүүн бүсэд очиж аман хүзүүнд хурдалсан. Өнөө жилийн тухайд дунд сунгаанд их аятайхан байсан. Түүний дараа бороо ороод уяа жаахан суларсан тал бий. Улсад мордохдоо дунд сунгаанд уралдах үеэсээ сул байсан шүү. Гэсэн ч айрагдсан. Дараа нь Зоригоо Тод “ханасан уяатай мордож чадаагүй ч айрагдлаа” гэж байсан.

-Сүүлийн 20-иод жилийн төрийн наадамд морь айрагдуулж байна гэсэн. Томоохон амжилтуудаасаа дурдаач.

-2014 онд Дорнод аймагт болсон зүүн бүсийн уралдаанд Монхор хүрэн гээд морин соёолон гурваар давхисан. Уржнан Өвөрхангайд болсон бүсийн уралдаанд Шувуухай гээд хээр соёолон мөн айрагдсан.

-Соёолон адуу илүүтэй хурдлуулдаг бололтой.

-Улсын наадам, бүсийн уралдаанд дөрвөн соёолон айрагдуулсан байна лээ.

-Айраг түрүү арвин байж, хос малгайтай болоорой хэмээн ерөөе.

-Баярлалаа. Та бүгдийн ажилд амжилт хүсье.

Б.Хастөр

2 Сэтгэгдэл

ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.