Тод манлай уяач Д.Хишигжаргал: Моринд дуртай охиндоо авч өгсөн үрээ аман хүзүүнд хурдаллаа

Сэтгүүлч
10-р сарын 26 -нд

-Дэлхийд ганцхан дэлгэр Монголын их цэнгэлдээ аз хийморийн бэлгэдэл соёолон аман хүзүүнд хурдлуулсан танд хүргэе. 

-Баярлалаа. Охины маань үрээ аман хүзүүнд хурдаллаа. Баяртай байна. Миний охин аав шигээ моринд дуртай юм. Өөрийнх нь өмчний адуу учраас нэр дээр нь бүртгүүлэн цоллуулж байгаа нь энэ.
-Аминхишиг охин төрийн зарлигт наадмаас нэг түрүү, нэг айраг хүртээд байгаа байх нь ээ.
-Тийм. Өнгөрсөн жил Хөвсгөл аймагт болсон “Хотгойдын хурд-4” хангайн бүсийн уралдаанд охины маань халзан үрээ түрүүлсэн. Өнөө жил төрийнхөө наадамд аман хүзүүдлээ. 
-Тод манлайн хөвгүүд ч бас моринд дуртай байх. Хөвгүүдийн нэртэй хүлгүүд хэрхэн хурдалж байна вэ?

-Хөвгүүд маань цөм өөрсдийн гэсэн адуутай. Өөрсдөө ажил төрөл хийж, амьдрал ахуйгаа авч яв гэсэн үүрэг өгсөн тул морь луугаа сайн анхаарч чадахгүй л байх шиг байна. Хэдэн адуу нь над дээр байдаг юм. Яваандаа өөрсдөө уях байлгүй дээ. Ер нь манай гэрийнхэн эр, эмгүй моринд дуртай хүмүүс бий. Эхнэр ч ялгаагүй намайг дагаад уралдаан наадам үзээд л явдаг юм. 


-Өнөө жил хэдэн насны морьтой ирсэн бэ?
-Даага, соёолон хоёртой ирсэн. Даага маань бариатай давхисаан. 
-Онцгой нөхцөлд зохион байгуулагдсан баяр наадмын талаар ямар бодолтой байна вэ?

-Жаргал зовлонг нь мэдэхийн хувьд олон уяачийн хөдөлмөр зүтгэл үнэгүйдэхийг харах хэцүү л байна. Эрлийз монголоор нь ялгахдаа баримталдаг энэ арга барил тохиромжгүйг бид олон жил харлаа. Болж бүтэхгүй байгааг нь хэлж ярьж, сануулж байна. Гэтэл яагаад өөрчлөхийг хүсдэггүй юм бэ. ММСУХ их хурлаараа баталсан журмынхаа дагуу хүний оролцоогүй хэмжээд, ямар ч маргаангүй наадам хийдэг. Бидний тэр туршлагыг хэрэгжүүлээч хэмээн зохион байгуулагчдад өөрсдийн ашигладаг төхөөрөмжөө хүртэл үзүүлж танилцуулсан. Сайхан эд байна гээд баяр хүргээд явсан. Улсын наадмаар урьдын адил модон метрээ барьчихсан хэмжээд хэл татлаад л явж байна. Ямар ашиг сонирхлоор өөрчлөлт хийдэггүй юм. Хүмүүс янз бүрээр ярьдаг. Одоо хууль хүчний байгууллагынхан шалгаж байгаа гэсэн. Тогтоох байлгүй. Ямар ч байсан 100 жилийн ойгоос өмнө нааштайгаар шийдвэрлэгдчих байх аа. Тэгж итгэж байгаа. 


Б.Хастөр


1 Сэтгэгдэл

ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.