Уралдаанч Б.Дагвадорж: Азарга, даага, соёолон унах дуртай

Тулгар төрийн 2229, Их Монгол Улс байгуулагдсаны 814, Ардын хувьсгалын 99 жилийн ойн Үндэсний их баяр наадамд аймгийн Хотонт сумын харьяат, нийслэлийн Алдарт уяач Д.Лхагвасүрэнгийн хар азарга айргийн гурваар хурдалсан билээ. Хар азаргыг 500 дугаартай, 11 настай уралдаанч хүү Баярмаагийн Дагвадорж ийнхүү унаж хурдлуулаад байхад нь бид баярын сэтгэгдлээс нь хуваалцлаа. 

-Сайхан наадаж байна уу? Баяр наадмынхаа сэтгэгдлээс хуваалцаач.

-Сайхан наадаж байна аа. Хоёр дахь жилдээ төрийнхөө баяр наадамд оролцож байна. Өнгөрсөн жил даага тавлуулсан. Энэ удаад азарга гуравлалаа.

-Хурдан морь унаад хэдэн жил болж байна даа?

-Гурав дахь жилдээ морьж байна.

-Ямар насны морь унах дуртай вэ? Аль нэгийг насыг унах дуртай байж болох уу?

-Бололгүй яахав. Азарга, даага, соёолон унах дуртай. Азарга бол эцэг мал. Даага бол хамгийн бага нь гэдэг утгаараа өхөөрдөм. Соёолонгийн уралдаан бол хамгийн гоё нь. Соёолонгийн өдөр энд чинь үзэгчид пиг дүүрдэг юм байна лээ. Энэ жилийн тухайд үзэгчгүй наадаж байгаа нь жоохон онцгүй л юм.

-Аль сургуульд сурдаг юм бэ?

-Би чинь Булганы хүүхэд л дээ. Гэхдээ СХД-ийн 121-р дунд сургуульд сурдаг юм.

-Сурлага өндөр биз дээ. Том болоод ямар мэргэжилтэй болъё гэж бодож байна.

-Дажгүй сайн сурч байгаа. Том болоод морины л хүн болно доо. Адуу бол сайхан амьтан. Манай ах чинь бас морь унана аа. Гэхдээ өнөө жил адуун дээрээ үлдсэн.

-Дараа дараагийн уралдаанд нь амжилт хүсье. Баярлалаа. 

П.Ундраа