Онгон сумын ОНЦГОЙ сайн уяач Сэр-Одын Дашгүнжин

Сэтгүүлч
2020 оны 7-р сарын 27 -нд

Онгон сумын онцгой сайн уяачдын нэг нь Сэр-Одын Дашгүнжин. Тэрээр 1945 оны чөлөөлөх дайнд оролцож, Монгол Улсын баатар нутаг нэгт “эх оронч” Ч.Дугаржавын команданд Хятадын Цагаан хэрэм, Дол нуур, Жэхэ хот хүртэл эх орныхоо тусгаар тогтнолын төлөө байлдаж явсан дайчин эр. Түүний эр зоригийг үнэлж “Ахмад дайчин” цол, Бид ялав, Халх голын 60 жилийн ойн медаль, Ардын хувьсгалын 50, 60 жилийн ойн медалиар шагнаж байжээ.


Тэрээр 1959 онд нэгдэлд гишүүнээр элсэн, 1967 онд сумын төл бойжилт, ашиг шимийн аварга болж, аймгийн ХАА-н тэргүүний сайчуудын зөвлөгөөнд оролцож байсан юм. Улмаар 1971 онд сумын уртын ноосны аваргаар тодорч, 1978-1979 онд малчдын дунд зарласан социалист уралдаанд V байр эзэлж, гарсан төлөө 96 хувиар бойжуулан, тэргүүний сууриар шалгарч байжээ.

Тэрээр ийнхүү мал маллах арга барилаараа бусдыгаа хошуучлахын зэрэгцээ морь уяж хурдлуулахдаа гаргуун нэгэн байж.

Нутгийнхан нь түүнийг “Хурдан морь уяж хурдлуулах, тэр тусмаа морины хоол тааруулахдаа гаргууд, ёстой л ясны уяач, эрдэмтэй хүн байсан” хэмээн дурсан өгүүлдэг.

С.Дашгүнжингийн хонгор азарга, улаан морь, саарал морь 1950-1960-аад оны үед олон удаа айраг, түрүүнд хурдалж байсан бөгөөд 1972-1980 оны хооронд гурван түрүү, 13 айраг хүртэн наадамчин олноо баясгажээ. Зарим жил гурав, дөрвөөр нь хүртэл айрагдуулж байв. Тухайлбал, 1974 оны баяр наадамд улаан морь нь түрүүлж, буган шүдлэн нь айргийн дөрөвт, хээр даага нь айргийн тавд хурдалсан бол 1975 онд их насны морио йргийн гуравт, хязаалангаа айргийн дөрөвт, даагаа аман хүзүүнд, 1976 онд их насны морио айргийн дөрөвт, хүрэн соёолонгоо айргийн гуравт, бор хязаалангаа түрүү магнайд, хонгор даага аман хүзүүнд, 1978 онд Буган азарга айргийн гуравт, цагаан морио айргийн тавд, буган хязаалангаа айргийн гуравт тус тус хурдлуулж байжээ. Ингээд бидэнд олдсон бүрэн бус амжилтын цувааг нь хүргэе. 


Амжилтын цуваа

1962 оны Онгон сумын баяр наадамд бор шүдлэн түрүү

1966 оны Онгон сумын баяр наадамд хүрэн морь түрүү

1968 оны багш нарын баярын уралдаанд ухаа азарга айргийн гурав

1969 оны багш нарын баярын уралдаанд хүрэн морь түрүү

1972 оны Онгон сумын баяр наадамд ухаа азарга айргийн тав

1973 оны Онгон сумын баяр наадамд буган даага айргийн гурав

1974 оны Онгон сумын баяр наадамд саарал морь түрүү

1974 оны Онгон сумын баяр наадамд буган хязаалан айргийн дөрөв

1974 оны Онгон сумын баяр наадамд хээр шүдлэн аман хүзүү

1974 оны Онгон сумын баяр наадамд хээр даага айргийн тав

1975 оны Онгон сумын баяр наадамд цагаан морь айргийн гурав

1975 оны Онгон сумын баяр наадамд Буган хязаалан айргийн дөрөв

1975 оны Онгон сумын баяр наадамд Буган шүдлэн аман хүзүү

1976 оны Онгон сумын баяр наадамд цагаан морь айргийн дөрөв

1976 оны Онгон сумын баяр наадамд ухаа даага аман хүзүү

1976 оны Онгон сумын баяр наадамд хүрэн соёолон айргийн дөрөв

1976 оны Онгон сумын баяр наадамд хээр хязаалан түрүү

1978 оны Онгон сумын баяр наадамд цагаан морь айргийн тав

1978 оны Онгон сумын баяр наадамд буган азарга айргийн гурав

1978 оны Онгон сумын баяр наадамд ухаа хязаалан айргийн тав

1986 оны Онгон сумын баяр наадамд буган соёолон түрүү

1989 оны Онгон сумын баяр наадамд хүрэн азарга айргийн гурав

1989 оны Онгон сумын баяр наадамд хээр морь айргийн тав

1990 оны Онгон сумын баяр наадамд хээр морь айргийн дөрөв

А.Тэлмэн

0 Сэтгэгдэл

ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.

    Сэтгэгдэл бичигдээгүй байна