Сайн моринд байх таван шинж

Нүд нь ширүүн харцтай болон уулихархай бөгөөд шөрмөс сэртгэр, цээж нь нимгэн хавчуу, магнай нь зузаан, бэрэвхий нь богино, хойд туурайн  моголцог урт, шөрмөс нь хийтэй тэлүү, өргөн.  Сэрвээ өндөр, аман хүзүү бүдүүн, толгойн мах хатингар, олон ясны уулзар агуу, сүвээний хавирга матаастай тэлүү, ташаа нь цухал, хас нь дүүрэн, салтаа агуу, зоо нуруу нь  бөгтрөгтэй, хөл нь эрс шударга, хүзүү нь нарийн урт, сүүл нь эрчтэй хатуу, бөгс нь хатингар. Эдгээр шинж цөм бүрдвэл түмэн мянгад торох түдэхгүй ганцаар түрүүлэх эрхэм сайн морь буй.

Олон адуунд байхад тарган цатгаланд нь үзвэл дээр гурван овоо тэгш, доор гэдэс бумба мэт чих нь дэлдээ үл харагдах, хөхөл нь шингэн нүдэндээ үл хүрэх, доод уруулаас дээд уруул элбэг илүү, урд туурайгаас хойд туурай их, хүнийг угтаж харах. Ийм бол лавтай сайн морь буй.

Холоос харахад урд хөлөө хойшоо шаасан гадас мэт тун шударга гишгэн зогсож байвал эрхэм сайн морь буй.

Их ч бай бага ч бай морины хэлбэр нь дөрвөн хөл бэх бөгөөд сайхан муухай ч болов хүзүү нь урт, дөрвөн цөгц сэтэрхий, хоёр сүвээ тулсан, дөрвөн хөлдөө нэвт эргүүлэгтэй, дөрвөн шүд гарсан. Энэ таван шинж төгссөн бол хүлэгт ойр буй.

Хүний хэл мэддэг зүр хүлгийн хэлбэр нь бяцхан толгойтой, шовх хошуутай, дэл сүүл шингэн болон их гуятай бөгөөд ганцаар явахдаа хашин. Энэ морь унаган цагтаа нар шингэтэл хэвтэхгүй буй.