Говьсүмбэр аймгийн МСУХ-ны тэргүүнээр Л.Жамбаасүрэн сонгогджээ

Удирдлага зохион байгуулалтын шинэчлэл хийсэн бас нэгэн холбооны талаарх мэдээллийг уншигч танаа хүргэе.

Өнөө жил “Боржигон-2019” төвийн бүсийн уралдааныг амжилттай зохион байгуулсан Говьсүмбэр аймгийн МСУХ-ны гишүүд, дэмжигчдийн ээлжит бага хурал 2019 оны 11 дүгээр сарын 26-ны өдөр болжээ. Хуралд 145 уяач оролцсноос санал хураалтанд 135 нь хамрагдаж, ирэх жилүүдэд удирдах тэргүүнээ сонгосон байна.

Говьсүмбэр аймгийн МСУХ-ны тэргүүнд  Л.Жамбаасүрэн, Ц. Мөнхжаргал нар нэр дэвшин мөрийн хөтөлбөрөө танилцуулан өрсөлдсөн бөгөөд санал хураалтанд оролцогсдын 52,5 хувь нь Л.Жамбаасүрэнг дэмжсэн байна. Харин нарийн бичгийн даргад Т. Ариунбат, Ж.Батбилэг, П. Эрдэнэзаяа нар нэр дэвшиж, Т.Ариунбат, Ж.Батбилэг нар нэрээ татан, П.Эрдэнэзаяа 100 хувийн саналаар сонгогджээ. Ийнхүү тус холбоог ирэх дөрвөн жил залуусын баг удирдахаар болж, ММСУХ-нд батламжлуулахаар хандаад байгаа гэнэ.

Дашрамд сонирхуулахад Говьсүмбэр аймгийн МСУХ  хоёр дэд тэргүүн, 35 тэргүүлэгчтэйгээр үйл ажиллагаагаа явуулахаар болсон байна.

Б.Хастөр