“Тод магнай”-нхан “Алтангадас”-тай сэтгүүлчтэй боллоо

Сэтгүүлч
2019 оны 10-р сарын 30 -нд

Нийслэл Улаанбаатар хот үүсэн байгуулагдсаны түүхт 380 жилийн ойн өдрөөр “Тод магнай” сэтгүүл, сайтын маань Ерөнхий эрхлэгч А.Эрдэнэтуяа “Алтангадас” одонгоор энгэрээ мялаалаа. Тэрээр сэтгүүл зүйн салбарт ажиллаад 18 дахь жилийнхээ нүүрийг үзэж байгаагаас 15-д нь хурдан морины сэтгүүлчээр ажиллаж байгаа билээ. Энэ хугацаанд 2009 оноос “Тод магнай” сэтгүүлийг үүсгэн байгуулж, 2012 оноос “Тод магнай” сайтыг ажиллуулж, монгол орныхоо 19 аймаг, 300 орчим сумаар явж хөдөөгийн хөх уяачдын амьдрал, тухайн нутгийн адууны онцлог, улс, бүс, аймаг сумандаа гаргасан амжилтыг хуваалцан, улмаар нэгэн цэгт архивлан баталгаажуулжээ. 

Энд нэмэхэд ирэх арваннэгдүгээр сард “Тод магнай” сэтгүүлийн 10 жилийн ой тохиож байгаа бөгөөд өнгөрсөн хугацаанд нийт 114 дугаарыг уншигчдын гар дээр тавьсан. Мөн Баян-Өлгий, Ховдоос бусад аймгуудын уяачид, тэдний алдарт хурдан хүлгүүд, гаргасан амжилтыг багтаасан тусгай дугааруудыг хийж ирсэн юм. Ийнхүү хийсэн бүтээснээ үнэлүүлж, “Тод магнай” сэтгүүлийн хамт олноос Алтангадастай сэтгүүлч төрсөн нь 10 жилийн ойн баяр дээр баяр нэмсэн сайхан хэрэг боллоо.
Хурдан морины босоо цагаан хийморь мөнхөд ивээг ээ.

П.Ундраа

1 Сэтгэгдэл

ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.