​Уралдаанч Б.Мөнх-Очир: Би том болоод л, наадам ч илүү гоё болоод л байна

Баяр наадмын хурдан шүдлэнгийн уралдааны /2019.07.10/ айргийн дөрөвт уралдаанч Баттогтохын Мөнх-Очирын унасан хар үрээ багтлаа. Уралдаанч жаалхүү найман настай бөгөөд Хан-Уул дүүргийн 59-р дунд сургуулийн хоёрдугаар ангийн сурагч. Тэрээр дөрвөн наснаас эхлэн морь унаж сурсан гэнэ. Харин улсын наадамдаа гурав дахь жилдээ оролцож байгаа а7ж. Өнгөрсөн гурван жилийн хугацаанд улсын наадмын зохион байгуулалтанд өөрчлөлт гарч байгаа эсэхийг асуухад “Би том болоод л. Наадам илүү гоё болоод л байна даа” хэмээн хариулах аж. Нээрээ л бяцхан хүү ухаан суухын хэрээр наадмын “амтыг” мэдэрч байгаа учраас тэр биз ээ.  Ингээд түүнтэй цөөн хором ярилцсанаа хуваалцаж байна.

 -Хурдан морь унасан дөрвөн жилийн хугацаанд ямар, ямар амжилт гаргаж байв?

-Аймаг сумандаа уралдаад зөндөө амжилт гаргаж байсан. Гэхдээ улсын наадам илүү гоё л доо.

-Аав нь морь уядаг уу?

- Аав маань Ховд аймагтаа морь уядаг. Гэхдээ би аавынхаа уясан морьдыг унадаггүй юм аа.

-Ирээдүйд ямар мэргэжилтэй болох вэ?

-Том болоод уяач болно оо. Морь уях гоё.

-Удахгүй цалингаа авна, тийм ээ. Нууц биш бол юунд зарцуулах вэ?

-Ээж аавдаа л өгнө дөө. Тэднийгээ баярлуулах сайхан шүү дээ.

-Ярилцсанд баярлалаа. Дараагийн уралдаануудад нь амжилт хүсье.

П.Ундраа