“Алтан азарга”, “Мөнгөн гүү”, “Молор унага”-ны эзэдтэй танилцана уу

Адуун сүргийнхээ үүлдэр угсааг сайжруулж, хурдны чиглэлээр өсгөн үржүүлсэн адуучин, малчин өрхийн хөдөлмөр бүтээлийг үнэлэх, алдаршуулах зорилгоор “Их хурд-7” уралдаанаас эхлэн  “Алтан азарга”,  “Мөнгөн гүү”, ”Молор унага”-ны эздийг тодруулдаг болсон. Өнөө жил шигшмэл морьдын “Их хурд-8” уралдааны үеэр адуун сүргийнхээ чанар чансааг сайжруулсан доорх нэр бүхий уяачдад батламж гардуулсан юм.

Алтан азарга:

1.Дундговь аймгийн Хулд сумын харьяат, МУ-ын Алдарт уяач Б.Баярсайханы хүрэн. Найман төл нь улс, бүсийн уралдаанд найм түрүүлж, 16 айрагдсан.

2.Сүхбаатар аймгийн Халзан сумын харьяат, МУ-ын Алдарт уяач У.Эрдэнэбилэгийн халиун. Зургаан төл нь улс, бүсийн наадамд дөрөв түрүүлж, дөрөв айрагдсан. Төлийн төл 10 адуу улс, бүсийн чанартай уралдаанд түрүүлж айрагдсан.

3.Говь-Алтай аймгийн Баян-Уул сумын уугуул, Тод манлай уяач Д.Цэрэнжигмэдийн Асгат саарал. Долоон төл нь улс, бүсийн уралдаанд гурав түрүүлж, таван айрагдсан. 

 4.Төв аймгийн Баянцогт сумын уугуул, Тод манлай уяач С.Ганхуягийн Станбул дуудлагатай Англи Кабардин хээр. 17 төл нь улс, бүсийн уралдаанд 12 түрүүлж, 23 айрагдсан.

5.Төв аймгийн Лүн сумын уугуул, Тод манлай уяач Б.Билэгдэмбэрэлийн Резви дуудлагатай Англи Кабардин халтар. Есөн төл нь улс, бүсийн чанартай уралдаанд зургаа түрүүлж, 30 айрагдсан.

Мөнгөн гүү:

1.Төв аймгийн Алтанбулаг сумын уугуул Г.Хадбаатарын хар. Гурван  төл нь улс, бүсийн уралдаанд дөрөв түрүүлж, гурав айрагдсан.

2. Завхан аймгийн Эрдэнэхайрхан сумын уугуул, Тод манлай уяач Н.Даш-Өлзийн зээрд. Дөрөв төл нь улс, бүсийн уралдаанд нэг түрүүлж, 10 айрагдсан.

Молор унага:

Дорнод аймгийн Цагаан-Овоо сумын харьяат, Тод манлай уяач Т.Батзоригийн унаган 40 адуу улс, бүсийн уралдаанаас 23 түрүү, 31 айраг хүртсэн.

Б.Хастөр