Уралдаанч Б.Төрболд: Заавал амжилт гаргана даа л гэж бодсон

Хүүхдийн ертөнц. Энд цагаахан бас жаргалтай. Бяцхан зүрхэндээ баяр хөөр дүүрэн байгаа нь нүднээс нь гэрэлтэх энэ өдрийн “гол дүр” уралдаанчдын нэг бол 10 настай Баттөрийн Төрболд хүү байлаа. Хурдан морины комиссын гэрээс малгайгаа чихрээр дүүргэж, амжилтаа мялаалгасан түүнийг Гэр бүл, хүүхэд залуучуудын хөгжлийн газрынхан тосон авч гарын бэлгээ мөн гардуулсан юм. Тус газрын хувьд төрийнхөө наадамд унасан хүлгэдээ айраг, түрүүгээр хурдлуулсан уралдаанч хүүхэд бүрийг ийнхүү баярлуулсан билээ.

Ингээд нарны халууныг ч анзаарах сөхөөгүй сэтгэлдээ нар гэрэлтүүлэн баярлаж байгаа Б.Төрболдын баярын сэтгэгдлээс хуваалцсанаа хүргэж байна.

-Малгай дүүрэн чихэртэй болчихсон байх чинь ээ. Амттай харагдаж байна шүү?

-Тийм ээ, наадмын бэлэг. /инээв/

-Баяртай байна уу?

-Тийм ээ, баярлаж байна. Улсын наадмаас анхны айргаа авлаа. Авах авахдаа соёолон айрагдуулсан болохоор гоё санагдаж байна.

-Хурдан морь унаад хэдэн жил болж байна вэ?

-Дөрөв дэх жилдээ морь унаж байна. Өмнө нь улсад уралдаж байсан ч хараахан амжилт гараагүй явсан юм. Тийм болохоор энэ удаад заавал амжилт гаргачих юм сан гэж бодоод л явлаа.

-Наадмаар морь унахаар ядардаг уу?

-Яалаа гэж. Харин ч гоё байдаг юм аа. Би чинь уяач аавтай. Багаасаа л адууны дэргэд өслөө.

-Аав нь хаагуур наадаж байна даа?

-61-т морь уядаг.

-Чи аавынхаа уясан морьдыг унаж байна уу?  

-Амжвал унана аа.

-Чиний хувьд ямар насны морь унах дуртай вэ?

-Даага унах дуртай. Хөөрхөн санагдаад байдаг юм.

-Аль сургуулийн хэддүгээр ангид сурдаг юм бэ?

-Төв аймгийн Зуунмодын нэгдүгээр сургуулийн тавдугаар ангид сурдаг.

-Ярилцсанд баярлалаа. Дараагийн уралдаануудад нь амжилт хүсье.

П.Ундраа