МОНГОЛ УЛСЫН АЛДАРТ УЯАЧ М.МАХБАЛ: ХОНГОР НУТГИЙН УЯАЧИД ДЭЭД ДӨРВӨН НАСАНД АЙРАГ ХҮРТЭЖ САЙХАН НААДЛАА

Хонгор нутгийн уяачид аз өм дүүрэн сайхан наадлаа. Төрийнхөө наадамд соёолон айрагдуулсан Алдартдаа баяр хүргэе.
- Баярлалаа. Хур бороо тэгширч, түмэн олон цугларсан сайхан наадам боллоо. Миний хувьд шүдлэн, хязаалан,  соёолон, их насны морь уясан. Шүдлэн, хязаалангаа мордуулж чадсангүй. Ямар шалтгаанаар хассаныг нь одоогоор мэдээгүй л байна. Их насны морь маань 60, 70-аадаар давхиж, хүрэн соёолон маань айрагдлаа.
Баярт мэдээ дуулахдаа бэлэн байсан уу. Өөрөөр хэлбэл, үрээгээ айрагдана гэдэгт хэр итгэлтэй байсан бэ?
- Хүрэн үрээ маань сунгаануудад хурдан байсаан. Нэг сунгаанд өнгөлөөд, нөгөөд нь аман хүзүүдээд, нэгд нь дөрвөлсөн. Миний морьдын уяа сойлгыг тааруулдаг Төв аймгийн Сэргэлэн сумын уугуул, МУ-ын Алдарт уяач С.Эрдэнэбат найз маань  уралдах өглөө нь “Хүрэн үрээний өнгө зүс сайхан, хоол унд нь таарсан. Сайхан мордлоо. Өнөөдөр түрүүлэх эсэхийг мэдэхгүй. Лавхан айрагдана” гэж хэлсэн. Найзын хэлсэнчлэн хүрэн үрээ маань сайхан давхиж, 10 жилийн дараа төрийн наадмын айргийг авчирлаа. Би яг арван жилийн өмнө 2009 онд Салхин халтар азаргаа улсын наадамд мөн айргийн гуравт хурдлуулж байсан. 

Аль хавьд ирэхээр нь хөлсний хашаа руу дөхсөн бэ?
- Төхөөрөмж унаад морьд гарахад л хүрэн үрээ зарлагдсан. Тувт зарлагдсаар байгаад  л барианд орсон. Манай гэр хөлсний хашаанаас нэлээд зайдуу дээр нь би хоёр гурван өдөр адуу манаад жаахан нойр муутай байсан болохоор амжиж очиж чадахгүй гээд Эрдэнэбатыгаа явуулсан. 
Уяачид дэлгэр сэтгэлтэй улс. Нутгийн уяачдын морьд айрагдахад догдлов уу?
- Тэгэлгүй яах вэ. Сайхан бэлгэшээлтэй санагдсан. Хонгор нутгийн уяачдын морь дээд дөрвөн насанд айрагдлаа. Миний мэдэхийн ийм түүх байхгүй. Нутгийн маань ард түмэн нийтээрээ цэнгэж суусан байх аа. Өнөө жил Ламын Гэгээний маань 380 жилийн ой, бүсийн уралдаатай. Хонгор нутгийн уяачид аз өм дүүрэн сайхан наадах эхлэлийг тавилаа хэмээн бэлгэшээж байна. 
Ерөөл бэлгээр болж, хонгор нутгийн уяачид одтой сайхан наадах болтугай. Амжилт хүсье. 
- Баярлалаа.