УРАЛДААНЧ Б.ХАТАНСАЙХАН: Онон Тод манлай шиг мундаг уяач болно

Сэтгүүлч
2019 оны 8-р сарын 05 -нд

Төрийн их баяр наадмын хоёр дахь өдөр /2019.07.11/. Хурдан азарганууд мордлоо, удалгүй эргэлээ ... барианд орлоо. 

Энэ бол Үндэсний их баяр наадам, Их Монгол улс байгуулсаны 813 жилийн ой, Ардын хувьсгалын 98 жилийн ойн баяр наадмын хурдан азарганы уралдаан юм. Уяач, уралдаанчид хийгээд наадамчин олны хувьд ч “шандас” шалгасан тус уралдаанд 13 настай Б.Хатансайхан хүүгийн унасан хүлэг аман хүзүүгээр хурдалж, дараа жилийн наадам хүртэл ярих сэдвүүдийн нэг болсон юм.  Ингээд түүний баярын сэтгэгдлээс хуваалцсанаа хүргэж байна. 
Жич: Тэрээр мөн Дорнод аймгийн Халхгол сумын уугуул, аймгийн Алдарт уяач С.Батмөнхийн хээр даагыг айргийн гурваар хурдлуулж, Төв цэнгэлдэхэд цоллуулахад нэмж цөөхөн асуултанд хариулт авсан юм. 


-Баяр хүргэе. Хэд дэх жилдээ улсынхаа наадамд оролцож байна вэ? 
-Баярлалаа. Хоёр дахь жилдээ улсын наадамдаа морь уналаа. Энэ жилийн хувьд хонгор азаргаа аман хүзүүгээр хурдлуулаад баяртай байна. Анх удаа улсын наадмаас айраг авлаа. 
-Өмнө жил нь ямар амжилт гаргаж байв? 
-Билгээ ахын морийг унаж дундуур л орсон. 
-Энэ удаад хэдэн нас унаж байгаа вэ? 
-Зургаан нас унах байх аа. Өчигдрийн уралдаанд дундуур давхисан. Харин өнөөдөр аз од гийлээ.
-Хэдэн жил морь унаж байна даа? 
-Анх гурван настай унаа морь унаж сурсан. Түүнээс хойш гэхээр 10 жил болчихож байна. 
-Энэ хугацаанд ямар, ямар амжилт гаргасан бэ? 
-Өмнө нь Булганы  бүсэд нэг түрүү, нэг айраг авсан. Батмөнх ахын адуу л даа. Хотод Баянгол дүүргийн наадамд бас соёолон түрүүлгэсэн. 
-Сая Цэнгэлдэхэд орж шагналаа гардан авлаа. Ямар санагдаж байх юм? 

-Анх удаа орж үзлээ. Гоё юм аа. Цэнгэлдэх дүүрэн үзэгчид өнгө алаглан суудалд тухласан байх нь сүрдмээр ч юм шиг. 
-Өргөмжлөл дээр нь юу гэж бичсэн байна вэ? Уншиж болох уу? 
-”Дорнод аймгийн Халхгол сумын 13 настай Батсайхан Хатансайхан .... Үндэсний их баяр наадам, Их Монгол улс байгуулагдсаны 813 жилийн ой, Ардын хувьсгалын 98 жилийн ойн баяр наадамд хурдан даагаа  гуравт хурдлуулсан тул баяр хүргэж, өргөмжлөл үнэ бүхий зүйлээр шагнав” гэсэн байна. 
-Аль сургуулийн хэддүгээр ангид сурдаг юм бэ? 
-Дорнод аймгийн тавдугаар сургуулийн 6А ангид сурдаг. 
-Хэд сурч байна? 
-Дажгүй ээ. 
-Том болоод ямар мэргэжилтэй болох вэ? 

-Миний аав Батсайхан Дорнод аймагтаа морь уядаг. Дүү Өсөхбаяр маань аавын уясан морьдыг унаж аймаг, сумандаа нааддаг юм. Би том болоод удам залгасан уяач болно оо. Гэхдээ МУ-ын Тод манлай уяач Д.Онон ах шиг мундаг уяач болно гэж боддог. 
-Дүүгийнхээ хүсч мөрөөдсөн бүхэнд амжилт хүсье. Ярилцсанд баярлалаа.
П.Ундраа

0 Сэтгэгдэл

ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.

    Сэтгэгдэл бичигдээгүй байна