Морины соёлыг дэлхийн түвшинд хүргэхэд хамтрахаа илэрхийлэв

ММСУХ-ны тэргүүлэгчид, салбар холбоодын удирдлагууд урд хөршид туршлага солилцох аялал хийж буй талаар бид өмнө нь мэдээлсэн. Дөрвөн өдрийн аяллын явцад Хөх хотыг түшиглэсэн хоёр морин тойруулгатай танилцаж, их эзний дурсгал бүхий Ордос хотоор аялж, түүний муж  залуу хот Камбашийн бүтээн байгуулалтыг үзэж сонирхсон төлөөлөгчдийг Өвөр Монголын “Хөх тал” морин спорт цогцолборын хамт олон хүлээн авч уулзсан юм. Энэхүү уулзалтанд монголын талаас Хөх хотын консул, “Хонгорын хурд” МСУХ-ны тэргүүн Д.Мөнх-Эрдэнэ, ММСУХ-ны дэд Ерөнхийлөгч Ц.Гончигсүрэн, ММСУХ-ны тэргүүлэгч С.Мөнхнасан, “Монгол наадам” цогцолборын дарга Д.Хатанбаатар, салбар холбоодын болон уяачид, хэвлэл мэдээллийн төлөөлөл оролцож харилцан туршлага мэдлэгээ солилцож, хамтран ажиллах тухай талаар зөвлөлдлөө. “Хөх тал” цогцолборынхон хур дагуулж ирсэн ар монголын төлөөлөгчдөд таатай байгаагаа илэрхийлэн Монгол морины өв соёлыг хадгалж үлдэх, хөгжүүлэн дэлгэрүүлж, дэлхийн түвшинд гаргахад хамтран ажиллах хүсэлтэй байгаагаа илэрхийлсэн юм.

Уулзалтын үеэр хэд хэдэн чухал санал санаачлагууд хөндөгдсөн бөгөөд бид энэ талаарх дэлгэрэнгүй сурвалжлагыг “Тод магнай” сэтгүүлийн энэ сарын дугаар нийтлэх болно.

Д.Солонго