Б.Далайн мялаалга наадам ирэх сард болно

Уул усны үзэсгэлэн болсон Увсын цэнхэр хязгаараас дээд цолтон төрөн гарсныг уншигчид санаж буй бизээ. Уугуул нутгийнхаа алдрыг өргөн улс, бүсийн дэвжээнээ одтой наадагч энэ эрхэм бол Зүүнговь сумын уугуул Тод манлай уяач Бичээрэйн Далай юм.

2006 оны баруун бүсийн уралдаанд хонгор соёолон түрүүлгэж, амжилтын гараагаа эхэлсэн тэрээр АХ-ын 90 жилийн ойгоор халтар хязаалангаа түрүүлгэж, хээр үрээгээ айрагдуулан морь сонирхогчдын танил болж байв.

Түүнээс хойш улс, бүсийн чанартай уралдаануудад тогтмол амжилттай наадан 2015 онд Монгол Улсын Манлай уяач хэмээх эрхэм цолны эзэн болж, Увс нутгийн уяачдаа түүчээлж байсан билээ.

Увс нутгаас  төрсөн анхны Манлай, Тод манлай уяач Б.Далай ирэх сарын 2-нд мялаалга наадмаа хийж, таван насны морь уралдуулан, 128 бөх барилдуулахаар болжээ. Тод манлай цолны мялаалга наадам Улаангом сумнаа болох бөгөөд даага, шүдлэн, хязаалан, соёолон, их насны морьд шандас  шалган, хүчитний өлгий нутгийн бөхчүүд уран мэхийг уралдуулах аж.

Б.Хастөр

0 Сэтгэгдэл

ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.

    Сэтгэгдэл бичигдээгүй байна