Адууны дэл сүүлээр хиймэл үс, сормуус хийнэ

Монгол Улсад адууны дэл, сүүл, сарлагийн саваг, тэмээний эр ноосыг боловсруулан экспортод гаргадаг МОН ТОРГОН ДЭЛ ХХК байгуулагдлаа. 

Монгол адууны дэл сүүл, сарлагийн саваг нь ширхэгт бүтээгдэхүүн дотроо дэлхийд чанараараа дээгүүрт ордог төдийгүй, дэлхийн зах зээлийн 40 хувийг эзэлдэг байна. МОН ТОРГОН ДЭЛ ХХК  нь адууны дэл, сүүл, сарлагийн саваг, тэмээний эр ноосыг урт богино хэмжээгээр нь, хар цагаан бор  өнгөөр нь, ангилан ялгаж, угааж ариутган багцалж  савлан, чанар стандартын шаардлага хангасан бүтээгдэхүүн болгож экспортолж эхэлсэн байна. Урьд өмнө нь ашиглагддаггүй байсан нөөцийг ашиглан нэмүү өртөг шингээн, экспортын бүтээгдэхүүн  үйлдвэрлэснээр хөнгөн үйлдвэрийн салбарт бас нэгэн дэвшил, нийгэмд үзүүлж буй үр ашгаараа ихээхэн ач холбогдолтой гэдгээрээ онцлог юм.  

Тус үйлдвэрт одоогоор 60 гаруй ажилтан ажиллаж, өдөрт дунджаар 200 кг бүтээгдэхүүн үйлдвэрлэн, БНХАУ-д экспортолж байна.  Одоогийн суурилагдсан хүчин чадал нь өдөрт 500 кг дэл сүүл боловсруулах боломжтой юм. Цаашид эдгээр хагас боловсруулсан бүтээгдэхүүнийг Европын орнуудад экспортод гаргах, боловсруулалтын түвшингээ ахиулан  гадаад, дотоодын зах зээл дээр 8-10 нэр төрлийн бүтээгдэхүүн /төрөл бүрийн гал усны хамгаалалтын хувцас, хөгжмийн чавхдас, уран зургийн бийр, эмэгтэйчүүдийн гоо сайхны бийр, сормуус, парик/  үйлдвэрлэн гаргахыг зорьж байгаа гэнэ.

Манай улсын хэмжээнд  жилд дунджаар адууны дэл 300 тн, адууны  сүүл-100тн,  сарлагийн  сүүл-60 тн, сарлагийн саваг 30 тн, тэмээний эр ноос- 400 тн бэлтгэх түүхий эдийн нөөцтэй юм.

 

0 Сэтгэгдэл

ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.

    Сэтгэгдэл бичигдээгүй байна