Б.Энхболдын хонгор азарга

Сүхбаатар нутгийн адуугаар хавтай сайхан наадагч эрхмүүдийн нэг нь Завхан нутгийн унаган хүү Тод манлай уяач Бат-Очирын Энхболд. Эрдэнэцагааны ээрэм талд тэнцсэн хоёр их насны морь авч, нэгийг нь түрүүлгэн, нөгөөг нь айрагдуулж улсын цолны босго лавхан алхсан уяач. Эрдэнэцагааны их морьдоор хавтай наадагч тэрээр Асгатын азаргаар бахтай наадсаныг уншигчид мэдэх биз ээ. 2009 онд болсон “Очирваанийн хурд-2009” баруун бүсийн уралдаанд түүний хонгор азарга аман хүзүүнд хурдлан эзэн уяачийнхаа Алдарт цолыг мялааж байсан түүхтэй. Энэхүү хонгор азарга бол аймгийн Алдарт уяач Дандарын Бор-Ухнайн унаган адуу юм. Д.Бор-Ухнай хонгор азаргаа хязааланд нь хүргэн Ганбаатарынхаа гэрийг мялааж бэлгэнд өгчээ. Бага насандаа гарч зугтаад үзүүр дээрээ унжиж зургаа, долоогоор давхичихаад байсан хонгор азаргыг 2009 онд аймгийн Алдарт уяач Дугарын Баяраа уяж, Асгат сумын баяр наадамд түрүүлгэн амжилтын өмийг нээжээ. Үүний дараа Б.Энхболд найзаараа дамжуулан авч, улсын наадамд уралдуулалгүй авч үлдээд баруун бүсийн уралдаанд мордуулжээ. Хавар зөв онгойсон хонгор азарга 140 хурдан хүлгээс аман хүзүүнд хурдлан эзэн уяачийнхаа магнайг тэнийлгэж, Асгат нутгийнхаа нэрийг өргөсөн билээ. 

Удам, угшил: 
Сүхбаатар аймгийн Асгат сумын харьяат, аймгийн Алдарт уяач Дандарын Бор-Ухнайн унаган адуу.
Эцэг: Дээд талаараа Батын Лхамсүрэнгийн харын угшилтай. Тодруулбал, хар азарганы төл хээр азаргыг дааганд нь Д.Бор-Ухнай авч, саарал гүү хураалган саарал азарга гарсан. Саарал азарга даагандаа айрагдаж, шүдлэндээ түрүүлсэн. Түүний төл хүрэн азарга мөн даагандаа суманд айрагдсан. Энэ хүрэн азарга бол Б.Энхболдын хонгор азарганы эцэг юм. 
Эх: Юүрэндондогийн улаан азарганы төрсөн дүү хонгор гүүний төл хонгор гүү.
Амжилтын товчоон:
2009 онд:
-Асгат сумын баяр наадамд түрүү
-”Очирваанийн хурд” баруун бүсийн уралдаанд аман хүзүү
2013 онд:
-АХ-ын 92 жилийн ойд аман хүзүүнд хурдалж яваад хадууран 15
-”Отгонтэнгэрийн хурд” баруун бүсийн уралдаанд 21 

Төлүүд:
Цэхэр хээр: Шүдлэн, хязааландаа 10 гаргаж давхисан
Бүжин бор: Шүдлэндээ Алтан овооны тахилга, зүүн бүсийн уралдаанд айргийн тав
Саарал шүдлэн: АХ-ын 97 жилийн ой, үндэсний их баяр наадамд 14, Алтан овооны их тахилгад аман хүзүү
Хүрэн морь: Алтан овооны их тахилга, зүүн бүсийн уралдаанд аман хүзүү

А.Тэлмэн




1 Сэтгэгдэл

ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.