Малын эм, тариаг эмчийн жоргүй олгохгүй

Малын эм, тариаг эмчийн жоргүй олгохыг өнгөрсөн оны зургаадугаар сараас хориглосон боловч хэрэгжилт нь тааруу байна. Өөрөөр хэлбэл Мал, амьтны эрүүл мэндийн тухай хууль 2017 оны 12 дугаар сард батлагдаж, 2018 оны зургаадугаар сараас хэрэгжиж эхэлсэн ч хэрэгжилт хангалтгүй байгаа юм. Монгол Улсын нутаг дэвсгэрт мал, амьтны эрүүл мэндийг хамгаалах, мал, амьтны гаралтай түүхий эд, бүтээгдэхүүний ариун цэвэр, эрүүл ахуйн шаардлагыг хангах, нийтийн эрүүл мэндийг хамгаалах, худалдааны чөлөөт байдлыг дэмжихтэй холбогдсон харилцааг зохицуулах зорилготой энэ хуулийн уяачид, малчдад хамаатай гол заалтуудыг дурдвал:
• Малын эм тариаг малын эмчийн жоргүй олгохыг хориглоно,
• Зарим төрлийн халдварт болон шимэгчтэх өвчнөөс эрүүлжүүлэх арга хэмжээний зардлыг мал, амьтны эзэн өөрөө хариуцна.
• Мал, сүргийнхээ эрүүл мэндийг хянан баталгаажуулсан мал, амьтны эзэн, малын эмчид төрөөс олгож буй урамшууллыг эн түрүүнд хүртээнэ.
• Зайлшгүй шаардлагаар төхөөрсөн малын тухайн орон нутаг дахь жишиг үнийн 40 хувь, гоц халдварт өвчний улмаас зайлшгүй шаардлагаар устгасан малын тухайн орон нутаг дахь жишиг үнийн 90 хувьтай тэнцэх нөхөн төлбөр олгоно.
Өмнө нь зарим төрлийн халдварт болон шимэгчтэх өвчнөөс эрүүлжүүлэх арга хэмжээний зардлыг төр хариуцдаг байсан бол улсын төсвийн ачааллыг багасах зорилгоор малчид хариуцах болсон байна.
Уг хуулийг зөрчсөн хувь хүн, хуулийн этгээдэд Эрүүгийн хууль, эсвэл Зөрчлийн тухай хуульд заасан хариуцлага хүлээлгэхээр зохицуулалт хийжээ.

Д.Ирмүүн

0 Сэтгэгдэл

ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.

    Сэтгэгдэл бичигдээгүй байна