МОНГОЛ УЛСЫН ШИЛДЭГ САЛБАР ХОЛБОО “САЙН НОЁН ХАНЫ ХУРД” ШИЛДГҮҮДЭЭ ТОДРУУЛЖЭЭ

«Тийн унжлагат» хэмээх шороон нохой жилийн босгон дээр Монгол Улсын Шилдэг салбар холбоогоор шалгарсан Өвөрхангай аймгийн Уянга сумын “Сайн Ноён Ханы Хурд” МСУХ 2018 оны ажил үйлсээ дүгнэн хэлэлцэж, шилдгүүдээ тодруулан шинэ жилийн цэнгүүнээ зохион байгуулжээ. Баярын арга хэмжээ шинэ жилийн цэнгүүн энэ сарын 18-нд Уянга сумнаа болж, 80 гаруй уяач оролцон нэгэн үдшийг хөөр хөгжөөн дүүрэн үдсэн байна. Тогтсон уламжлалын дагуу цэнгүүний үеэр 2018 онд амжилтаараа бусдыгаа хошуучилсан уяачид, хурдан морины зүтгэлтнүүд, уралдаанч хүүхдүүдийг шилдгээр тодруулж шагнасан аж. Ингээд Монгол Улсын Шилдэг салбар холбоо “Сайн Ноён Ханы Хурд” МСУХ-ны шилдгүүдийг танилцуулъя.

Шилдэг уяач: Аймгийн Алдарт уяач Г.Ариунболд
Шилдэг залуу уяач: Г.Бархасбадь
Шилдэг азарга: Аймгийн Алдарт уяач Г.Ариунболдын халиун азарга /»Дүнжингаравын хурд-2018» хаврын бүсийн уралдаанд айрагдсан/, аймгийн Алдарт уяач Д.Давааноровын саарал азарга /Өвөрхангай аймгийн баяр наадамд түрүүлсэн/, сумын Алдарт уяач Л.Майдаржавын хонгор азарга /Өвөрхангай аймгийн шигшмэл хурд уралдаанд аман хүзүүнд хурдалсан/
Шилдэг их насны морь: Аймгийн Алдарт уяач Д.Давааноровын саарал морь
Шилдэг соёолон: Сумын Алдарт уяач Д.Баярсайханы сартай зээрд 
Шилдэг хязаалан: Аймгийн Алдарт уяач Д.Батзоригийн бор 
Шилдэг шүдлэн: Сумын Алдарт уяач Т.Ренчинлхүмбийн ухаа 
Шилдэг даага: Залуу уяач П.Дамдинсодномын хул 
Дашрамд дуулгахад, уяачдынхаа ирэх жилийн аз хийморийг тольдох үүднээс сугалаа явуулж, 10 дааганы эзнийг тодруулсан байна.

А.Тэлмэн

0 Сэтгэгдэл

ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.

    Сэтгэгдэл бичигдээгүй байна