УРАЛДААНЧ Г.ЭРДЭНЭМӨНХ: ЗАМАА МЭДДЭГ БОЛОХООР УНАНА ГЭЖ АЙГААГҮЙ

Улсын наадмын эхний өдөр унасан үрээгээ айргийн тавд хурдуулан баярын нээлтийг одтой хийсэн уралдаанч Г.Эрдэнэмөнхтэй ярилцлаа.  

-Унасан хязаалангаа айргийн тавд хурдлуулан уясан эзэн, наадамчин олноо баясгалаа.  Баяр хүргэе. 
-Баярлалаа. Баярын эхний өдөр үрээгээ айрагдууллаа, сэтгэл өндөр байна. Үрээгээ айрагдана гэж бодоогүй байсан болохоор бүр их баярлаж байна. 
-Улсын наадам болон улсын чанартай бүсийн уралдаанаас өмнө нь айраг түрүү хүртэж байсан уу? 
-2017 онд эрлийз дунд ангилалд үрээгээ айргийн дөрөвт хурдлуулсан. Энэ жил хоёр дахь айргаа авлаа. Өвөрхангай аймгийн Хархорины бүсийн уралдаанд орж байсан. 
-Бороо ороод зам халтиргаа ихтэй байна. Унах вий гэж айв уу?
-Зам бороо ороод устай боловч халтиргаа нь гайгүй байна. Өмнө нь улсын наадамд уралдаж байсан туршлагатай, замаа мэдэж байсан учраас унах вий гэсэн айдас байгаагүй. Одоо шүдлэнгээ унаад уралдана. Бороо нэмж ороод байвал зам ямар болох юм бол доо. Уг нь сая гайгүй байсан. 
- Миний дүү хэдэн настай вэ. Хэдэн жил хурдан морь унаж байгаа вэ? 
-Намайг Ганболдын Эрдэнэмөнх гэдэг, 12 настай. Би таван настайгаасаа хурдан морь унаснаас хойш долоон жил болж байна.
- Унасан морио айраг, түрүүнд хурдлуулан ахиад баярын сэтгэгдэл хуваалцаарай. 
-Баярлалаа, тэгнэ ээ эгч ээ.

"Тод магнай" сэтгүүл. Дугаар  99. 2018 он

0 Сэтгэгдэл

ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.

    Сэтгэгдэл бичигдээгүй байна