Ж.БАТБААТАРЫН ЦАГААН ХУЛ

АХ-ын 97 жилийн ой, үндэсний их баяр наадмын хурдан азарганы уралдаанд цагаан хул азаргаа есөөр давхиулсан Говь-Алтай  аймгийн Халиун сумын харьяат Ж.Батбаатар нь Засгийн газрын тогтоолт бүсийн наадмаас нэг түрүү, найман айраг аваад байгааг тоймлон хүргэвэл: 2011 оны Увс аймагт болсон баруун бүсийн уралдаанд даага аман хүзүү, айргийн  дөрөв, их нас айргийн тав, 2012 онд Баян-Өлгийд болсон баруун бүсийн уралдаанд шүдлэн аман хүзүү, айргийн дөрөвт тус тус хурдлуулж, 2015 онд болсон Увс аймгийн 90 жил, баруун бүсийн уралдаанд халтар шүдлэнгээ түрүүлгэжээ. Харин өнгөрсөн жил Сүхбаатар аймагт болсон зүүн бүсийн уралдаанд эрлийз бага насанд даага аман хүзүүдүүлж,  Багануурт болсон төвийн бүсийн уралдаанд хонгор морь аман хүзүүнд давхиулсан байдаг. 

УДАМ, УГШИЛ:
Монгол Улсын Тод манлай уяач Д.Ононгийн унаган адуу.
Эцэг: Сарт хул 
Эх: Үндсэн хуулийн цэцийн гишүүн Сугарын хул азарганы эх хул гүү
АМЖИЛТЫН ТОВЧООН:
2017 онд хязаалан:
Төв аймгийн баяр наадамд долоо 
Эрдэнэтийн «Түмний эх» уралдаанд аман хүзүү
2018 онд соёолон:
Эрдэнэтийн «Түмний эх» уралдаанд айргийн гурав
АХ-ын 97 жилийн ой, Үндэсний их баяр наадамд ес

"Тод магнай" сэтгүүл. Дугаар 99. 2018 он