УРАЛДААНЧ Х.ОДБАЯР: БИ МОРИО ЯАЖ ДАВХИУЛАХАА МЭДНЭ

2017 оны МУ-ын шилдэг есөн уралдаанчийн гуравт эрэмбэлэгдсэн “Макс” гал уяаны уралдаанч Хишигбатын Одбаяртай уулзан ярилцлаа. Тэрээр өнгөрсөн жил улсын баяр наадмаас нэг айраг, засгийн газрын шийдвэртэй бүсийн уралдаанаас гурван түрүү, дөрвөн айраг хүртсэн амжилттай. Өнөө жил АХ-ын 97 жилийн ойд их морь айргийн тавд хурдлуулж ирсний дараа бид уулзан баярын сэтгэгдэл хуваалцсан билээ.  

-Миний дүү өөрийгөө танилцуулаарай? 
-Намайг Хишигдэмбэрэлийн Одбаяр гэдэг. Хан-Уул дүүргийн 59-р сургуулийн 7а ангид сурдаг. Би 12 настай, зургаан наснаас хурдан морь унасан. Улсын баяр наадамд өмнө нь морь унасан туршлагатай учраас морио яаж давхиулахаа мэднэ. Өчигдөр гэхэд би хязаалан унан 20 гаргаад давхиулсан. Өнөөдөр хүрэн морио айргийн тавд хурдлууллаа, баяртай байна.  Маргааш соёолон унана. 
-Өнөөдөр морио айрагдана гэдэгт хэр итгэлтэй байсан бэ?  
-Улс, бүсийн уралдаанд айрагдаж түрүүлсэн олон хурдан морь уралдаж байгаа болохоор тэднийг гүйцэж чадах болов уу гээд итгэлгүй байсан. Өглөө гарахад уяач “Амыг нь сайн барьж яваарай, эхний хэдийгээ алдаж болохгүй шүү” гэсэн. Тэгээд уралдаад зурхай даваад ороод ирэхэд гоё санагдсан. Улс бүсийн уралдаанд айраг түрүүнд хурдлах хамгийн гоё наадам болдог.  
-Ямар насны морьдыг унаж айраг, түрүүнд хурдлуулж байсан бэ?  
-Улсын наадамд гурав дахь жилдээ морь унаж байгаа. 2016 онд дааганаас бусад нас унан дундуур давхиулсан. Тэр жилээ бүсийн уралдаанд уралдаагүй. 2017 онд зээрд морьтойгоо Дүнжингаравын хурд уралдаанд түрүүлж, улсын баяр наадамд соёолон аман хүзүү, азарга долоо, эрлийз морио наймд давхиулсан. Өнгөрсөн жил би улс, бүсийн уралдаанаас гурван түрүү, таван айраг хүртсэн амжилттай. 
-Анхны айраг, түрүүгээ хаанахын ямар уралдаанаас авсан бэ?
-2016 оны Говь-Алтай аймагт болсон хаврын бүсийн уралдаанд сая айрагддаг хүрэн морио хязааланд нь аман хүзүүнд хурдлуулсан. Тэр наадмаас хоёр айраг хүртсэн. 
-Ярилцсанд баярлалаа. Дараа дараагийн нь уралдаанд амжилт хүсье.

"Тод магнай" сэтгүүл. Дугаар 99

0 Сэтгэгдэл

ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.

    Сэтгэгдэл бичигдээгүй байна