АЙМГИЙН АЛДАРТ УЯАЧ Ц.ДАМДИН-ЯДАМ: МАНЛАЙ УЯАЧ БАЯРАА НАЙЗЫГАА ДАГАЖ ЯВСААР МОРИНД УРВАСАН

Баруун хязгаар Увс аймгийн Тэс сумын уугуул Цогт-Очирын Дамдин-Ядам Үндэсний их баяр наадамд цоохор үрээгээ айрагдуулан төрийн наадмын анхны айргаа хүртээд байгаа юм. Хилийн чанадад ажил хэргээр яваа цоохор үрээний эзэнтэй нийгмийн сүлжээгээр холбогдож, цөөн асуултанд товчхон хариулт авлаа.  

-Төрт ёсны их баяр наадамд цоохор хязаалангаа айргийн гурваар хурдлуулсан танд баяр хүргэе. Энэ таны улсын наадмын анхны айраг байх аа?
-Баярлалаа. Улсын наадмаас анхныхаа айргийг авсандаа их баяртай байна. 
-Энэ жилийн хувьд улс даяар гандуу байсан. Цоохор үрээнийхээ уяа сойлгыг хаана тааруулсан бэ?
-Сүхбаатар аймгийн Түмэнцогт суманд Монгол Улсын Манлай уяач Т.Ихбаяр уяа сойлгыг нь тааруулсан. Ноднин Одгэрэл Манлай уяж, улсын баяр наадамд наймаар давхиулж байсан юм. Цоохор үрээ маань энэ жил амжилтаа ахиулан айргийн гурваар хурдаллаа.  
-Улсын наадмын анхны айргаа авсан таны хувьд Засгийн газрын тогтоолтой бүсийн наадмын хишигтэй юу?  
-Бүсийн наадмын хоёр айрагтай. 
-Хурдан цоохороос гадна урам сэргээн давхидаг хүлгүүдээ танилцуулаач?
-Миний халзан морь 2017 оны өвөл Бандгаагийн зохион байгуулсан бооцоот уралдаанд таваар давхиж Чансаатай морьд уралдсан том уралдаан болсон юм.
-Хэн таныг моринд урвуулж, улсын наадамд морь цоллуулан зогсох бахархалтай энэ өндөрлөгт хүрсэн бэ?
-Миний хувьд морь уяад удаагүй, хоёр жил л болж байна. Монгол улсын Манлай уяач Дайдийхүүгийн Баяраа миний багын найз. Бид арван жилийн нэг ангийнхан байгаа юм. Найз Баяраагийнхаа уяагаар явж, улс, бүсийн наадамд морийг нь балиашиглаж явсаар нэг л мэдэхэд өөрөө нэг юм нэр дээрээ уралдуулж үзмээр  санагдаад л эхэлсэн дээ. 
-Улсын наадмын анхны айраг нь булган сүүлтэй байж олон, айраг түрүүнд хөтлөх болтугай.

"Тод магнай" сэтгүүл. Дугаар 99